Roniştoxanê Wanî derheqê amadekarîyanê şerî yê PDKyî û hemkarîya PDKyî ya bi Tirkîya de ANFyî rê qal kerd. Roniştoxan vera kerdişanê PDKyî nêrazîbîyayîşê xo mojna û venga Serekê PDKyî Mesûd Barzanîyî da ke nê kerdişan ra fek vera bido û seba yewîya kurdan bixebito.

Nûrî Gurî ard ziwan ke ê qetî şerê kurdan nêwazenê û vat: ''Kerdişê PDKyî kurdan rê xêr nêkenê. Wa PDK nêro kayanê dişmenî. Ganî Mesûd Barzanî seba yewîya kurdan bixebito. Ganî na xeletîye ra abigêro. No şer do peynîya PDKyî bîyaro. Wa Barzanî bifikiro ke hela Tirkîya heta nika seba kurdan se kerdo. Barzan û Helebçe çi lez vîrê Barzanîyî ra şîyê? 1988 de şarê Başûrî Saddamî ra rema ame tîya. Ma ê sey way û birayê xo qebul kerdî. Kurdan rê yewîye lazim a, sewbîna şansê kurdan çin o.''

Edîbe Babur îfade kerd ke pê paştdayîşê PDKyî Tirkîya hêrişê Başûrî kena û vat: ''Gerîlayê azadîye hê vera hêrişan xo ver danê la PDK hetê dişmenî de ca gêno. Ma nê xîyanetî qetî qebul nêkenê. Wa Barzanî abigêro raştîya xo ser. Tirkîya dişmenê kurdan a. Ez venga PDKyî û Mesûd Barzanîyî dana ke wa nê rayîrî ra bigêrê. Wext wextê yewîya kurdan o.''

Mamosta Halîl Hanayî vat: ''Eke kurdî bibê yew meseleya kurdan nêmanena. Wexto ke DAÎŞî hêrişê Hewlêrî kerd gerîlayan seba Hewlêrî şer kerd. La PDK nika dişmenî reyde têgêreno û hêrişê gerîlayan keno. Ganî Mesûd Barzanî goreyê kurdayetîye têbigêro. Wextê Qirkerdişê Helebçe de ma wayîrê başûrijan vejîyayî, ma her çi înan reyde bar kerd. Wa kurdî bizanê ke eke nêbê yew do şorê yew bi yew.''

Nezîr Topçuogluyî vat: ''PKKyî ra nêbo kam do kurdan bipawo? Pêşmergeyan êzidîyî war verdayî remayî. Eke şerê zereyî yê kurdan biqewimîyo nê şerî de domanê kurdî do bimirê. Ganî kurdî vera polîtîkayanê şerî yê Mesûd Barzanîyî wurzê payan ser û yewîya xo awan bikerê.''

Mecît Ozturkî vat: ''Barzanîyî xo rê Başûr de qralîye naye ro û dişmenê kurdan de bîyo yew. Ma nêwazenê tifingê xo biancê birayê xo. Têgêrayîşê Azadîye yê Kurdîstanî û Rayberîya ci vera şerê zereyî yê. Yewîya kurdan her çî ra zafêr lazim o. Ganî Mesûd Barzanî na xeletîye ra bigêro û yewîya kurdan awan bikero.''