Xeylêk şaristanan de bi wesîleya Roşanê Ziwanê Kurdkî aktîvîteyê sey konser, kargeh, wendişê şîîran ameyî kerdene.

Amed

Amed de çarçewa Roşanê Ziwanê Kurdkî de çalakîyê cîya-cîyayî ameyî kerdene. Aktîvîteya DEM Partî, MED-DER, Destar, DBP û Komeleya Edebîyatkeran de pankarta 'Her dem kurdkî, her dem kurdî' ameye akerdene. Hemserekê DEM Partî Tuncer Bakirhan û Hemserekê DBPyî Çîgdeme Kiliçgun Uçar û Keskîn Bayindir zî terwrê aktîvîte bîyî.

Bername de tîyatroyê ''Bedir-Xan''î ame kaykerdene. 

Dima Bakirhanî seba xizmetanê ci plaket da Hemsereka DEM Partî ya Amedî Pinare Sakik Tekîn. Hemsereke Çîgdeme Kiliçgun Uçar zî plaket girewt û pare kerd ke a plaketê xo dîyarîya ê cinîyan ê tepişteyan kena ke vera tecrîdî xo ver danê. Dima dengbêjî vejîyayî sehne ser û deyîrî vatî.

Îzmîr

Serkêşîya Avesta Ziwan û JînArtî de panelêk ame kerdene. Panel de nuştox Mustafa Borakî qisey kerd û da zanayene ke ganî kurdî bi ziwanê xo qisey bikerê. Nuştoxe Yasemîne Elvan îfade kerd ke Kurdî-Derî bi seyan nuştoxî resnayê. Qiseykerdişan ra dima estanikî ameyî vatene û dengbêjî vejîyayî sehne ser. Koroyê Cinîyan ê DADî zî vejîya sehne ser.

Xana Axpar

Serkêşîya şaredarîye de konserêk ame serûberkerdene. Konser de pankarta ''15ê Gulane Fîraz Bo'' ameye akerdene. Hemşaredarê Çinarî zî tewrê aktîvîte bîyî. Konser de Jin Ma bi kincanê neteweyîyan vejîyayî sehne ser.

Şirnex

Roja çarine ya Festîvala Ziwan, Kultur û Hunerî ya Cizîre de taxanê Sûr û Nûrî de kargehê domanan ame kerdene.

Mersîn

Mersîn de bi wesîleya Roşanê Ziwanê Kurdkî serkêşîya Merkezê Kulturî yê Sanatolia de aktîvîteyêke ameye kerdene.