Tarîxnas û şaîrê rojawanijî Mistefa Reşîdî ard ziwan ke dewleta tirka ke Efrîn îşxal kerdo, heman planê xo Başûrî rê zî vixt dewre û vat tehluke esto ke sey Efrînî Başûr zî destî ra şoro.
Tarîxnas û şaîrê rojawanijî Mistefa Reşîdî ANFyî rê qisey kerd û vera îşxalê dewleta tirke yê serê Başûrê Kurdîstanî nêrazîbîyayîşê xo mojna.
Reşîdî ard ziwan ke şarê kurdî dinya ra ame îzolekerdene, dewleta tirje ney ra hêz gêna coka hêrişê xo zêdînayî û vat: ''Dewleta tirke çi wazena kena, dinya vera ci bêveng a. Dewleta tirke Başûr de daran birnena, daristanan vêşnena yanî kolonyalîzmo winasên cayêkê bînî de çin o. Dewleta tirke Efrîn de wina kerd, Başûrê Kurdîstanî de zî wina kena. Ez nê hêrişan bi xurtî şermezar kena. Ganî na mesele bêra çareserkerdene.''
Mistefa Reşîdî vist vîrî ke îşxalî ra dima dewleta tirke Efrîn talan kerd û nika zî Başûr talan kena. Reşîdî vat: ''Tirkîya Efrîn de dest na zeytûnêran, bax û baxçeyanê şarê Efrînî ser. Destê îşxalkeran de çeke esta, destê kurdan de çeke çin a. Coka çew nêeşkeno vengê xo bikero.
Dewleta tirke planê îşxalê Başûrî vist dewre. Şarê Başûrî neçare mend ke dewanê xo biteriknê. Dewleta tirke nika qasê 30 kîlometreyan dekewta Başûr û xîret kena ke aver şora. Xora Başûr de baregehê înan ê leşkerîyî estê. Ne hukmatê Başûrî ne zî hukmatê Iraqî vera hêrişan nêrazîbîyayîşê xo nêmojnenê.
Wezîranê Başûr û Iraqî eşkerayîyî dayî û nêrazîbîyayîşê xo mojnayî. La no qîm nêkeno. Ganî hukmat ney bikero. Goreyê tay embazan têkoşînê vera DAÎŞî ra dima ma dinya ser o ameyê qebulkerdene la no raşt nîyo. Hema zî ma 'lîsteya terorî' de yê, tay kesî zî paştî nêdanê ma.''
