Dewa Sisê ya qezaya Licê ya Amedî de vera gorê gerîlayê PKKyî Abdulbasit Okî yo ke serra 1994î de şehîd bi, 22ê gulane de reya hîrêyîne hêriş ame kerdene. Keyeyê Okî roşanî ra verî şi goran ser la dî ke gorê lajê înan reyna ame rijnayene. Goristan de pêro kerrayê goran ameyî şiknayene. Keyeyî kerrayê şikteyî arê dayî û reyna ca kerdî.

Keyeyan bale ante ser ke herême de rojanê peyênan de operasyonê leşkerîyî zêdîyayî û nê texrîbatî zî o çax ameyî kerdene. Goristanê Sisê serra 2015î de zî hewa û erdî ra dîyabi bombayan ver. Keyeyanê sisêyîjan vera rewşe nêrazîbîyayîşê xo mojna.

Dadîya gerîlayê şehîdî Andulbasit Okî (Hemdem) Rûhîye Ok îfade kerd ke nê hêrişê vera goran seba şeqiznayîşê erjan yenê kerdene. Dayîke Rûhîye da zanayene ke aye 20 serran ra dima lajê xo defin kerd û vat: ''Gorêkê lajê mi çinbi ke ez şora tede qisey bikera, ey ser o biberma, derdanê xo vaja. Mi 20 serran hasmên, koy, kerra û dûrîyan rê lawikî vatî. 20 serran ra dima gorê ci bi û mi hînî wina hîs kerdêne ke lajê mi Abdulbasit hetê mi de yo. Domanê ma bihêz bîyî, înan tarîxêk viraşt. Ganî ma wayîrê têkoşîn û vîrameyîşanê înan bivejîyê, ma nêverdê ke nê hêrişî bêrê kerdene.''

Dewa Erkencîkî ya qezaya Farqînî ya Amedî de zî waya şehîd Bîlal Fîdanî (Dijwar Erîş) Yasemîn Kaya derheqê babete de wina qisey kerd: ''Ma qedexeyê tebervejîyayîşî ra dima do şorê gorê birayê xo ser. Nê hêrişê vera goran nênê qebulkerdene. Çira vera goran hende hêrsîn û kîndar ê nêno famkerdene. Ma her tim waşt ke cuya têdûşte biba awankerdene. Ma hêvî kenê ke rojêke no hêrs û kîn qedîyeno û vera goranê ke vîrameyîşê ma yê peyênî yê, hînî hêriş nêno kerdene.''