Endama Konseya Rayberdişî ya KJKyî Zerrîne Rûken beşdara bernameyêkê taybetî yê kanala Medya Haber bîye û rojdem ercna.

Rûkene bi yadkerdişê şehîdanê menga gulane dest pê qiseykerdişê xo kerd û nê vatî: ''Pîya bi xoverdayîşê tarîxî yê Rayber Apoyî Kurdîstan de xoverdayîş esto. Şarê kurdî pê çalakîyan kewt serra 23. ya komployî. Serkêşîya cinîyan de şarê ma bi xoverdayîşê pîlî cewab dano hêzanê komplokeran. Tecrîd dewamê planê çokdayîşî yo. No planê qirkerdişî yo. Ewro pîya bi tecrîdî operasyonê qikerdişî yenê kerdene. Sere Amerîka heme welatê mîyanneteweyî zanê ke bê Rayberîye meseleya kurdî nîna çareserkerdene. Îmrali de sîstemê îşkenceyî esto ke wazenê ke sey çîyêkê normalî ramojnê. Çalakîyê ke yenê viraştene têna semedê Rayberîya ra xebergirewtişî nê semedê azadîya ci ya fîzîkîye yenê kerdene. Şexsê Rayber Apoyî de polîtîkaya taybete ya şerî yena rayraberdene. Pêvînayîşê 4 deqayan girdîya tehlukeyî ramojnena. Xora Rayber Apoyî tewirê xo ramojna. Ma zî sey cinîyan na rewşe çirey qebul nêkenê. Ganî vera sîstemê îşkence û îzolasyonî xoverdayîş bêro pîlkerdene.''

Endama Konseya Rayberdişî ya KJKyî Zerrîne Rûken bale ante xoverdayîşê gerîlayan ê vera hêrişê îşxalî yê vera Zap, Avaşîn û Metîna ser û vat: ''Xoverdayîşo bimbarek do qetî ser bikewo. Garê û Heftanînî ramojna ma ke xoverdayîşê gerîlayan do qetî ser bikewo. Ma tîya reyna dî ke gerîla senî garantîyê serkewtişî û çimeyê azadîye yo. Sey xoverdayîşê Gerê  xoverdayîşê Zap, Avaşîn û Metîna zî do ser bikewo. No serkewtişê pêro şarê kurdî yo. Serkewtişê şehîdan û Rayber Apoyî yo. Hêrişê îşxalî raştê serrgêra Qirkerdişê Armenîyan ame. No hêrişo plankerde yo la dewleta tirke vera gerîlayanê azadîye do ser nêkewo. Dewletê ke vera hêrişê îşxalî bêveng ê hemkarê sûcê dewleta tirke yê. Dewleta tirke goreyê şertanê şerî tênêgêrena. Çeka kîmyewîye yeno şuxulnayene la vera nayî veng nêvejîyeno. No hêrişê vera hema leteyanê Kurdîstanî yo û rolê heme dewletan tede esto.''

Rûkene wina dewam kerd:  ''Zîhnîyetê faşîst ê AKP-MHPyî butçeya şarî semedê şerî şuxulneno. Tirkîya hetê ekonomî ra cum bîya. Şar feqîr, vêşan o.  Reyna janê Korona zî zaf tesîr kerd. Dewlete butçe semedê weşîya şarê xo nê semedê şerî şuxulnena. Coka ganî şarê Tirkîya zî vera nê operasyonan vejîyê. Hêrişê qirkerdişî têna vera şarê kurdî nîyê, do serê şarê Tirkîya de zî tesîr bikerê. Her kes ganî nayî bizano eke vera nê operasyonan tewiro hempar mero romojnayene, no şer do her kesî bivêşno. Coka ganî hetê demokrasîyî vera operasyonan tewirê xo ramojnê.''

Zerrîne Rûken vat: ''Dewlete 40 serrî yo semedê qedînayîşê PKKyî operasyon kena la eslê xo de ê zî zanê ke çîyo winayên do mebo. Destkewteyê Başûrê Kurdîstanî zî binê tehlukeyî de yê. Şarê ma yê Başûrî ganî nayî rind fehm bikero. Hêrişê îşxalî  têna vera PKKyî nê vera heme destkewteyanê kurdan ê. Xoserîye û statuyê hukmatê Iraqî zî binê tehlukeyî de yo. Iraqî ra biney veng vejîyeno la qîm nêkeno. Selahîyetdarê Başûrê Kurdîstanî zî bêveng ê. Ganî PDK û YNK nê operasyonan sey vera xo bigîrê dest. Yew kurd Başûr de rehet nêeşkeno bigêro la dewleta tirke pîya bi Mît û çeteyanê xo Başûrê Kurdîstanî de xo ca kerdo. Her ca de qereqolê leşkerî viraştî. Çîyo winayên nîno qebulkerdene. Xoverdayîşê gerîlayan semedê pawitişê çar leteyanê Kurdîstanî yo. Sey şarê kurdî çîyê ma ke ma vînî bikero çîn o la çîyê ke ma do qezenc bikerê zaf ê. Coka ganî ma têkoşînî pîlêr bikerê.''