Endamê Konseya Rayberdişî ya KCKyî Sabrî Okî Bernameyê Taybetî yê Stêrk TVyî de tayê ercnayîşî kerdî. Ercnayîşanê Okî ra tayê noqtayê girîngî wina yê:

''Rayber Apo hema zî tecrîdkerde yo la azadîya Rayber Apoyî merkezê têkoşînê ma yo. Rayber Apoyî pêvînayîşê xo yê peyênî de zî pare kerd ke tecrîd dewam keno û seba çareserîye amade yo. Ganî ma her ca de vera tecrîdî û seba azadîya Rayber Apoyî têkoşînêkê rêxistinkerdeyî bikerê. Bahçelîyî vatêne ke ganî Rayber Apo Meclîs de qisey bikero. Ma nêzanenê ke ho se beno. La eşkera yo ke Îmrali de vera Rayber Apoyî tedayêka pîle est a û Rayber Apoyî vera ney têkoşîn keno.

Ma tim vanê ke seba çareserîye adreso verên Îmrali yo. Dewleta tirke nika tengasîye de ya. Dewleta tirke nêeşkena verê îradeyê gerîlayan û şarê ma de netîceyêke bigêra. Nika Rojhelatê Mîyanênî de zî şerê pîlî est ê. Dewleta tirke her roje hîna teng bena. Dewlete kena ke PKKyî manîpule bikera, PKK û Rayber Apoyî cîya bikera û sîyasetê kurdan pasîf bikera. Dewlete hetêkî ra qalê çareserîye kena la hetê bînî ra înkar û qirkerdişê kurdan rê dewam kena.

Dewlete vana qey do bieşka kurdan bixapîna la hinî do wina nêbo. Hem vanê wa Rayber Apoyî bêro qisey bikero hem zî qeyûman tayîn kenê. Eke dewlete durist a wa azadîya Rayber Apoyî bîyara ca.

Bahçelîyî çend rojî verî DEM Partî rê vat ke 'Ya şima yenê rayîrê ma ser, yan zî do çin bibê.' Dewlete çîyêk zî xeletî ra nêvana. Bahçelîyî zî qestî ra wina vat. Dewlete wina mesaj dana ke wa kurdî sey ci têbigêrê. Qeyûmî seba ney yenê tayînkerdene. Şarê ma ganî vera qeyûman bi hawayêkê bêmabênî têkoşînê xo rê dewam bikero. Teyna kurdî ney êyê ke xo rê vanê demokrat ê, sosyalîst ê ganî vera qeyûman vejîyê. Aseno ke şaredarîyanê CHPyî rê hema zaf qeyûmî do bêrê tayînkerdene. CHP têkoşînê vera qeyûman de qels mendo. Ganî pêro hêzî vera faşîzmê qeyûman yew bibê.

Şer û hêrişê Îsraîlî hê dinya vurnenê. Dewleta tirke zî gêrena ke na rewşe de plananê xo yê serê Sûrîye bîyara ca. Dewleta tirke Sûrîye de tim paştî daye DAÎŞî, nika zî paştî dana cerganê HTŞyî. Xora zafê cergê HTŞyî endamê DAÎŞî yê. Dewleta tirke wazena ke Sûrîye goreyê xo dîzayn bikera û tede canêda Tirkîya. 

La hêzanê kurdan Rojawan de, Mûsil de, Başûr de rayîr nêda DAÎŞî. Senî ke DAÎŞ bin kewtbi HTŞ zî do bin bikewo. Nika dewleta tirke paştî dana HTŞyî la HTŞ do bibo sereyê belaya her kesî. Hêz û eqlê dewleta tirke çin ê ke Sûrîye de heta peynî bimana. 

Dewleta tirke ge hetê welatanê NATOyî de ya, ge hetê welatanê Astana de ya. Ne Astana ne zî NATO nêeşkenê meseleya Sûrîye çareser bikerê. Meseleya Sûrîye ganî bi paradîgmaya neteweya demokratîke bêra çareserkerdene.

Dewleta tirke derheqê şerê vera gerîlayan de raştîyan nêvana. Gerîlayî artêşê pîlî yê. Xora şehîdê ma zî est ê, benê la ma pêro raştîyan şarê xo de pare kenê. Dewleta tirke bi teknolojîyêka pîle û çekanê kîmyewîyan hêriş kena ancî zî nêeşkena ser bikewa. Erdogan û Bahçelî na babete de hendê zûran kenê ke faşîsto bîn Umît Ozdag bîle daymîş nêbeno. PKK payan ser de yo. Têgêrayîşê ma bawerîyêke dano merdiman la dewleta tirke her kesî rê zûran kena, komelî xapînena û zûrê ci zî vejîyenê werte.''