Hemserekê Pêroyî yê HDPyî Mîthat Sancarî aktîvîteya 'Seba edalet û raştîye canî yenê yewca' de Dêrsim de elewîyan reyde ronişt. Aktîvîteya ke otêlêke de ameye kerdene, wekîlê HDPyî, temsîlkarê rêxistinanê komelê sivîlî, Şaredarê Dêrsimî û xeylêk hemwelatîyî tewrê ci bîyî. Aktîvîte de fotografê Seyîd Rizayî salone de ame akerdene.

Aktîvîte seba Denîze Poyraz pê deqayêkê rêzgirewtişî dest pêkerde.

Hemvervatoxa Komîsyonê Şaran û Bawerîyan Tulaye Hatîmogullari îfade kerd ke ê seba heq, edalet û azadîye ameyî pêser û ard ziwan ke ê do pê hîşmendîya Seyîd Riza û Fatma Ana vera bêedaletîye vinderê.

Dima Mîthat Sancarî qisey kerd û vat: ''Edalet, raştîye û heq esasê bawerîya elewîyan ê. Ma Dêrsim de ameyî pêser. Çunke Dêrsim warê Seyîd Rizayî û ê dêrweşan o. Ma nika prosesêkê winasênî de yê ke têkoşînê edaletî, azadîye û têdûştîye emser do vera hîşmendîya tekpereste, tedaker, qirkere fînal bikero. Eke ma nê rayîrî ra pîya şorê ma eşkenê na hîşmendîye çin bikerê. Elewîyî bi serran o maruzê cîyakerîye manenê û tek waştişê înan têdûştîye ya. La wa şarê ma bizano ke heta ke azadîye û têdûştîye çinbê haştîye zî nêbena

Ma wazenê pêro bindestê nê welatî pîya têbigêrê. Wa çew nêvajo 'ez sey înan nîya, mi rê çîyêk nêbeno.' No sîstem rojêke ê kesî zî do qir bikero. Bêrê ma pêro canî bibê yew. 

Derheqê partîya ma de dewaya qefilnayîşî esta, embazanê ma rê dafika Dewaya Kobanê ronîyaye, embazê ma yenê destbendkerdene, tepiştene. No sîstem xoza, nasname, kultur, ziwan û bawerîya Dêrsimî keno hedef. Edalet pawitişê nê nasname, kultur, bawerî û xozaya ma yo. Ganî ma seba pawitişê înan bêrê yewca. 

Ma dewaya qefilnayîşê HDPyî de heta peynî partîya xo bipawê. Ma do qetî partîya xo fesîh nêkerê. Kokê HDPyî Koyê Munzurî de yo. Partîya ma dara ke pê awa nê kokan zergûn bena. Çew nêeşkeno na dare kokê ci ra biqerifna. Eke partîya ma bêra qefilnayene zî ma do têkoşînê xo rê dewam bikerê û şarî xo reyde mişawere bikerê. Rayîrê ma şima do dîyar bikerê.

Dêrsim hetêkî ra warê dejê Seyîd Rizayî yo la hetêkî ra zî warê xoverdayîş û têkoşînî yo. Coka ma nê şaristanî ra dest pêkerd. Ma şima ra fikr û îrfanê şima rîca kenê. Seke Seyîd Rizayî kursîya îdamî de vatbi 'Ez pê zûran û xîleyanê şima nêeşka, no mi rê derd bo la ez zî şima ver de çok nêşîya erdî ro, no zî şima rê derd bo.'