Hemserekê Pêroyî yê HDPyî Mîthat Sancar semedê tewrbîyayîşê aktîvîteya ''Ganî semedê Heqîqet û Edaletî yênê Têhet'' ya ke do siba bêro kerdene ame Dêrsim.

Dêrsimîjan bajarekê Pêrî yê qezaya Mazgêrdî ya Dêrsimî de Sancar peşwazî kerd. Sancarî ke Meydanê Seyîd Rizayî de qisey kerd seba ke Dêrsim de yo keyfweşîya xo ard ziwan û nê vatî:

''Dêrsim bajarêko raştê qirkerdişan ameyo la şarê ci çirey çok nêdayo. Xora sembolê nê zî pîrê ma Seyîd Riza yo. Zîhnîyetê ke 1937-38 de ganê ma qir kerdî û zîhnîyetê îqtîdarê ewro seycîye yê. Senî ke şarê ma rixmê heme qirkerdiş û zextan o wext çok nêda ewro zî milê xo çewt nêkeno. Zîhnîyeto ke hêrişê xoza, Munzur û her hetê Dêrsimî keno û zîhnîyeto ke hêrişê ma ke ê zî eynî ca ra xo weye kenê. Bi eynî waştişî hêrişê nasnamê û îtîqatê ma kenê. Xoza, kultur û îtîqatê ma yew ê.

Ma Dêrsim de yê huzurê Seyîd Rizayî de yê. Ma bajarê xoverdayoxan de yê. Ma do bi îradeyê şaran ê hemparî helqê HDPyî yê xurtî bidê ciwîyayenê. Helq pêt o, dare pêt bîya pîl. Ma do na dare pîlêr bikerê. Ma do na dare pê hêvî, bawerî na dare pîlêr bikerê.  Ganê sînayeyî wa çew bêhêvî nêbo. Hêvî tîya de ya.  Heta ke têkoşîn dewam bikero hêvî bena pîl. Hêvî tîya de ya, şar û HDP tîya de yê. Hêvî weş û war payra ya. Qet çew nêeşkeno HDPyî biqefilno. HDP do rayîrê xo rê dewam bikero. Ma do miheqeq HDPyî bidê ciwîyayene.''

Sancarî pîya bi partîyijan vîrdarîya Seyîd Rizayî de fotografê Denîze Poyraz û vilikî nayî ro û vat:'' Ma tira serenêronayîş û vera xîleyan, kayan û zuran têkoşînkerdiş musayî. Ma reyna huzurê to de soz danê ke ma do kayanê înan pûç vejê.''