Şahîda Fermanê 3ê Tebaxa 2014î û Fermandara YJŞyî Vîyane Hebabî derheqê qirkerdişî û xoverdayîşê Şingalî ser o ANFyî rê qisey kerd. Qiseykerdişê Fermandare Vîyane Hebabî ra beşêk wina yo:

''Wexto ke hêrişan dest pêkerd şewa 2ê tebaxa 2014î de ez keye de bîya. ma pêro weriştî û şîyî banan ser. Ma dî ke hetêkî ra DAÎŞ hêriş keno hetêkê bînî de zî pêşmergeyî remenê. DAÎŞ hêdî hêdî nêzdîyê ma bîyêne, ma zî bînaya Têgêrayîşê Komelê Demokratîkî û Azadî yê Êzidîyan (TEVDA) de bîyî. DAÎŞ berî ra kewt zere ma zî pey ra remayî. Ma têna waştêne xo biressnê koyê Şingalî. Verî ma eşnawitbi êzidîyan ser o ferman dîyayo la ma pê bawer nêkerd. Çunke pêşmergeyî mîyanê şarî ra gêrayêne û înan vatêne ke ê do ma bipawê. La hêrişan de înan ma war verdayî. DAÎŞî Şingal kerd wêran.

Ma hînî pê bawer kerd ke ma do pêro bimirê. Şanê fermanî gerîlayê PKKyî ameyî. La ma eşnawit ke pêşmergeyan verê înan girewto. La rixmê astengîyan zî gerîlayî ameyî resayî hewarê ma. O çax êzidîyan nêzanayêne PKK çi yo, Rayber Apo kam o, gerîlayî kam ê. La înan hêvîyêka pîle daye ma, ma xelisnayî û xeylêk şehîdî dayî.

Gerîlayan seba xopawitişî ciwanê êzidîyî perwerde kerdî. Ez zî o çax tewra YJŞyî bîya. Mi xo rê vat ke se beno wa bo ganî ma qesasê xo bigêrê. O çax girewtişê çeke wezîfeyêko exlaqî û merdimî bi. O çax xeylêk ciwananê êzidîyan çeke girewte xo destî û vera DAÎŞî şer kerd. Şerê vera DAÎŞî ver bi taxa Roje dewam kerd.

Ma 11 taxan vera DAÎŞî şer kerd. Vengê ma û DAÎŞî şîyêne yewbînan. DAÎŞ hende nêzdîyê ma bibi. 2014 de dima ke taxê qedîmî yê Şingalî ameyî xelisnayene ma heta menga 11. ya 2015î vera DAÎŞî şer kerd. Ma şaristanê xo bi temamî DAÎŞî ra pakî kerd. Nê qirkerdişî de tewr zaf cinîyan dej ant. Hînî mîyanê komelê êzidîyan de cinîyê êzidîyî sey çêran şinasîyenê. Hema aqîbetê 3000 cinîyan ê êzidîyan eşkera nîyo. Bi hezaran domanî bêdadî bêbabî mendî. Hema zî esteyê êzidîyan koyan de yenê dîyene, gorê komkîyî hêdî hêdî eşkera benê.''