2017 de ma warê Çemçoyî yê Zapî de yê. Ma seba ke embazanê ke Rayber Apo dîbî û akademîya Şamî de mendbî bivînê kewtî rayîr. Tay merdimî est ê ke zerrîya merdimî de rêçê xo verdenê. Fermandaro qehreman Ahmet Rûbar zî kesêko winasên bi.

Verî ey nêwaşt mi de qisey bikero la mi bi înadî qebul nêkerd. Ewnîya pelêkê zerdî ra û bi heyecanî dest pê qiseykerdişî kerd: ''Serra 1997î de ez seba perwerdeyî warê Rayberîye de bîya. Mi rê wextêko tewr ercîyaye o wext bi. Wexto ke mi Rayber Apo dî, tewr zaf xozayîya ey tesîrê mi kerd. Atmosferê ey kerdêne ke merdimî dormeyê ey de bêrê yewca. Rayberîye merdiman ra hes kerdêne, waştêne înan de eleqedar bibo, perwerde bikero. Ey qedr dayêne merdiman, coka nameyê çewî xo vîr a nêkerdêne. Wexto ke o ewnîyayêne çimê merdiman tede xeyalê cuya azade kerdêne.''

Ahmet Rûbarî hîs û fikrê xo hende rind îfade kerdêne çew cade tesîrê ci de menêne. Dima Ahmet Rûbarî wina qala tecrîdî kerde: ''Rayberîye cayê sey Îmraliyî de raştîye ciwîyena. Azadîya ey ganî ma rê biba sebebê têkoşînî. Nêno qebulkerdene ke merdimêko azad binê îşkenceyî de bibo. Coka ez do heta peynî bi îdîaya azadîya ey şer bikera.''

Roportajî ra dima narey gerîlayanê ciwanan ma rê qala Ahmet Rûbarî kerde û vat: ''Fermandarî ganî wina bibê. Her hele şerwananê xo reyde têbigêrê, pare bikerê, bihuyê, motîvasyonî biafernê. Yanî ganî sey embaz Ahmetî bibê. Fermandarêko xozayî û cidî.''

Wexto ke ma çayê xo şimitêne Ahmet Rûbarî ma rê derheqê Koyê Govende de qisey kerd û pare kerd ke o serê koyî de nuseno. Ey vatêne: ''Govende yew dadîya ke gerîlayî bi serran o kena verarê xo!''

Ma roportajî ra dima Ahmet Rûbar û gerîlayî peyê xo de verdayî û ver bi patîkayêka bêpeynî kewtî rayîr. Vîrameyîşê înan do zerrîya ma de bimanê...