Roniştişo verên ê dewaya Erogluyî de qerarê kifşî ame dayene

Engîn Eroglu wexto ke heywanî xo çerênayêne otobuse dabi piro û kewtibi Çemê Munzurî û cuya xo vînî kerdebî. Roniştişo verêne ê dewaya Erogluyî ameye kerdene. Waştişê tepiştişî yê di şikdaran ame redkerdene û qerarê kifşî ame dayene.

15ê hezîrane de Qezaya Pulurî ya Dêrsimî de Engîn Eroglu wexto ke heywanî xo çerênayêne otobuse dabi piro û kewtibi Çemê Munzurî û vîndî bibi. Cigêrayîşanê 19 rojan ra dima meyîtê Engîn Erogluyî amebi dîyene. Tehqîqatê dewa yo ke hetê Serdozgerîya Komare ya Dêrsimî ra ame amadekerdene, îdîanameyê ci hetê Mehkemeya Cezaya Girane ya 2. ya Dêrsimî ra amebi qebulkerdene. Îdîaname de derheqê ramitoxê otobuse Erdal Samoglû û muawînê ci Mesut Îçîyerî de seba ke 'îxmalî ra bîyê sebebê mergî' 10 ra heta 20 serran ceza yena waştene.

Roniştişê dewa yo verên Mehkemeya Ceza ya Girane ya 2. ya Dêrsimî de ame kerdene. Erdal Samoglû û Mesut Îçîyerî yê ke sey şikdar yenê vînayene ke bîyê sebebe mergê Erogluyî bi sîtemê SEGBÎSî tewrê mehkeme bîyî. Maye û Pîyê Erogluyî û avûkatê ci zî tewre roniştişî bîyî. Samoglu û Îçîyerî ke bêtepiştiş yenê hukmkerdene ard ziwan ke ê bêsûc ê û beraatê xo waşt. Dozgerî waşt ke şikdarî bêrê tepiştene la heteyê mehkeme no red kerd û qerarê kifşî da ke do17ê  temmuze de bêro kerdene.