'Seba ke lajê xo bivîna ez ewnîya 50 cenazeyan, no îşkence yo'

Cenazeyê 70 kesanê ke Nisêbîn de qedexeyê vejîyayîşê teberî de wefat kerd hema zî Goristanê Bêkesan de yenê vindertene. Babî Metîn Karadumanî ard ziwan ke heta ewro ewnîya nêzdîyê 50 cenazeyan la cenazeya lajê xo nêdîye û vat: "Îşkence bi ma yeno kerdene.

Qezaya Nisêbînî ya Mêrdînî de 14ê adara 2016î de qedexeyê vejîyayîşê teberî dest pêkerd û 21ê nîsana 2018î de zî qedîya. Cenazeyê zaf kesanê ke qedexeyê vejîyayîşê teberî de wefat kerd hema zî nêameyî dayene keyeyanê ci. Nê cenazeyî o çax Mêrdîn, Riha, Dîlok û Meletî de goristananê bêkesan de ameyî definkerdene. Nasnameyê tay cenazeyan zî hema nêameyî eşkerakerdene.

Keyeyan muracatê Serdozgerîya Komare ya Mêrdînî kerd ke cenazeyan bigêrê. La têna 10 cenazeyî ameyî dayene û 70 cenazeyî nêameyî teslîmkerdene.  

Serdozgerîye dosyaya cenazeyan mehkeme rê erşawit ke mehkeme derheqê na babete de wayîrê selahîyetêkî nîya. Dima ke mehkeme dosya apey erşawite serdozgerîye û keyeyan newe ra muracatê Serdozgerîye kerd la Serdozgerîye têna da zanayene ke ê do pabeyê testanê DNA vinderê.

Babî Metîn Karaduman zaf reyî seba ke cenazeya lajê xo bigêra muracat kerd. Babî Karadumanî pare kerd ke selahîyetdaran ci rê vat ke cenazeya lajê ci taxa Kanîka de ya la hema zî nêeşkîya cenazeya xo bigêra. Karadumanî vat: "Dosyayî Mêrdîn de mîyanê pêlekan de yenê wedaritene. Ma nêeşkenê cenazeyanê domananê xo bigêrê. 4 serran ra nata ma nê îşkence ancenê. Ma muracatê Serdozgerîye û ÎHDyî kerd la ma nêeşkîyayî cewabêk bigêrê. Mi di cenazeyan ser o şik kerd ke mi va qey yê lajê min ê. Ma seba testê DNAyî muracat kerd. La testî nêameyî kerdene. Ma waşt ke gorî bêrê akerdene la serdozgerîye qebul nêkerd.

 Heta ewro seba ke cenazeya lajê xo bivîna ez ewnîya 50 cenazeyan la mi cenazeya lajê xo nêdîye. Ma wazenê ke cade cenazeyî teslîmê ma bibê. Îşkence bi ma yeno kerdene. Serrêk û nême ra nata ez nêeşkena biresa dosya."