Torra Ziwan û Kulturê Kurdan û Platformê Ziwanê Kurdkî 21ê sibate de seba ke kurdkî biba ziwanê fermî kampanyaya îmzayan dayebî destpêkerdene. Kampanya do heta 15ê Gulane Roşanê Ziwanê Kurdkî dewam bikera. Heta nika bi hezaran îmzayî arê dîyayî. Kampanya binê versîya operasyonanê qirkerdişê sîyasî de dewam keno.

Endam û Îdarekarê HDPyî yê Rezanî yê Amedî zî rixmê janî, astengîyan ber bi ber gêrenê û seba kapanya îmzayan arê danê. Hemwelatîyî eleqeyêkê pîlî mojnenê kampanya. Rezan de heta nika 15 hezar îmzayî arê dîyayî.

Hemsereka HDPyî ya Rezanî Sumeyye Kirici îfade kerd ke înan verî 122 taxan de dest pê xebate kerd û vat: ''Ma şîn, veyve û zîyaretê nêweşan de zî kampanya rê îmza arê danê. Ma dewan de seba naye komîsyonî awan kerdî. Ma qedexeyê janî yê 5 rojan de 5 hezar îmzayî arê dayî. Şar eleqeyêkê pîlî mojneno kampanya. Wexto ke ma keyeyan ra gêrayêne dadîyêke berma û pare kerd ke a verî semedo ke kurdkî qisey kerda maruzê şîdetê menda.  Keyeyî vanê 'ma şima reyde yê.' Hedefê ma 100 hezar îmzayî yo. Gereka ma mîlyonêk nê bi des mîlyonan îmzayan bierşawê Meclîsî.'' 

Sumeyye venga her kesî da ke wa tewrê kampanya bibo.