Roniştişo diyîn ê dewaya Hemşaredarê Amedî Selçuk Mizrakliyî yo ke herinda ci de qeyûm amebi tayînkerdene û wezîfe ra amebi dûrvistene Mehkemeya Amedî de ame kerdene. Mizrakli bi rayîrê SEGBÎSî beşdarê roniştişî bi û avûata ci Zulale Erdogan, Mehmet Emîn Aktar, Cîhan Aydin û Muhsîn Bîlal zî roniştiş de amade bîyî.

Balkêş o ke polîsan zî roniştiş teqîb kerd.

Hemsereka KCDyî Leyla Guven, Hemsereka Pêroyî ya DBPyî Salîha Aydenîz û heyetêko ke kesanê xerîban, akademîsyenan, roşnvîran û sîyasetmedaran ra amebi meydan dewa teqîb kerde.

Dozgerî bira xo eşkera kerde û waşt ke Mizrakli sey tepişte bêro hukmkerdene.

Mirakli û avûkatanê ci vera na bire wext waşt.

Serekê Baroyê Amedî Cîhan Aydinî verê bira dozgerî werişt ra û vat: ''Ma nêeşkenê tîya de qala huqûqî bikerê. Ganî birêz Mirakli cade bêro veradayene. Seba tepiştişî semed çin o. Ma venga şima danê ke nêbê hemkarê nê sucî. Tîya de sucêk çin o. Muwekîlê ma semedanê bêqanûnîyan ra yeno hukmkerdene. Ganî bi şertê kontrolê edlîyî bêro veradayene.''

Mizrakliyî zî derheqê bire de qisey kerd û vat: ''Ez semedê bire ra ke verê cû ameye dayene tepişte ya. Beşdarîya bi SEGBÎSî zî bi xo bêhuqûqî ya. Ez tîya de eşkera kena ke ez reya bîne bi SEGBÎSî beşdarê roniştişî nêbena. Ez derheqê bira dewamê tepiştişê xo de vatişê xo yê peyênî vana. Na dewa semedê sîyasî ra ameye akerdene û ez zî nê semedan ra tepişte ya.''

Mabênêkî ra dima mehkeme bire daye ke Mizrakli sey tepişte bimano û roniştiş taloqê 9ê adare kerd.