Astsubay Alî Kaya û Ozcan Îldenîz û îtirafkar Veysel Ateş 9ê teşrîna peyêne ya 2005î de qezaya Şemzînanî ya Colemêrgî de pê bombayan hêrişê Kitabxaneyê Umutî kerdbi. Roniştişo 14. yê muhakemekerdişê hêrişkeran perey Mehkemeya Cezaya Girane ya Wanî de ame kerdene.

Endamê dewlete tewrê roniştişî nêbîyî. Wayîrê Kitabxaneyê Umutî Seferî Yilmaz û avûkatê ci Baroyê Wanî tewrê roniştişî bîyî. Yilmazî waşt ke sûcdarî bêrê cezakerdene. Avûkatanê dewa ra Hetkarê Serekê Baroyê Wanî Hamza Çîftçîyî vist vîrî ke êyê ke boma eşte hetê şarî ra tepişîyayî û vat: ''Ma wazenê nê şaxsî bitepişîyê. Nika nê şexsî teber de bi rehetî gêrenê. Wijdanê şarî ney qebul nêkeno.''

Dozgerîye waşt ke 'kêmasîya delîlan' ra 3 endamê dewlete zî bêrê veradayene. Roniştiş taloqê 20ê kanûne ame kerdene.

Seferî Yilmazî roniştişî ra dima ANFyî rê qisey kerd û bale ante ser ke versûcî serê sûcî de tepişîyayî, serê înan de dokument û krokîyî estbîyî.

Yilmazî vat: ''Şarê ma roja serebûtî Alî Kaya wesayîtê ci de tepişt. Dima ke serebût bi pîlêr Tîmanê Têgêrayîşê Taybetî waşt delîlan wedarnê. Dozgerê ê çaxî Ferhat Sarikayayî waşt cezaya 39 serran bido înan, mehkeme zî qebul kerd. Dima Sarikaya bi îdîaya 'FETO'yî tepişîya. Dozgerê nikayênî zî versûcî vera dayî. o çax AKP wayîrê na dewa vejîyabi. La netîceya pêkerdişê AKP û Ergenekonî de no serebût ame heta tîya. Êyê ke kurdan kişenê nênê cezakerdene. Ez na mehkemeya AKPyî ra çîyêk nêpawena.''

Avûkat Kadîr Kutevîyî vat: ''Ma wazenê huqûq semedê her kesî derbazdar bibo. Rixmê hende beyananê şahîdan û delîlan zî waştişê veradayîşî çinkerdişê huqûqî yo. Ma do na dewa war meverdê.''