Torra Ziwan û Kulturê Kurdan çarçewa kampanyaya ke 21ê sibate ya 2021î de seba ke kurdkî wa Tirkîya de biba ziwanê fermî û ziwanê perwerdeyî amebî destpêkerdene, de Cizîre, Amed û Wan de mîtîngan di virazê. 

Mîtîngo verên 3ê hezîrane (siba)  do Cizîre de bêro kerdene. 4ê hezîrane de Wan û 7ê hezîrane de zî Amed de do mîtîngî bêrê kerdene. Derheqê babete de ewro Şubeyê Odayê Mîmaran ê Amedî de eşkerayîye ameye dayene. Îdarekarê Torra Ziwan û Kulturê Kurdan û pabesteyê ci û endamê komîteya amadekerdişî yê mîtîngan tewrê eşkerayîye bîyî.

Eşkerayîye de ame vîrardene ke kampanyaya îmzayan change.org  hem online hemze nuştekî dewam kena û semedê tewrbîyayîşî ame vengdayene. Reyna semedê tewrbîyayîşê mîtîngan zî ame vengdayene û ame vatene ke muracatê mîtîngan ameyo kerdene la înan hema cewabêko fermî nêgirewto. Eşkerayîye de bale ameye ser antene  ser ke 9 partîyê sîyasîyî û xeylêk rêxistinê komelê sîvîlî paştî danê na kampanya û ame vatene ke kurdî bi ziwanê xo yê dayîke bîyî yew û rixmê heme astengîyan do bi mîloyonan îmzayan arê bidê û bişawê heme dezgeh û sazgehanê Tirkîya û mîyanneteweyî. Hemsereka  Komeleya Cigêrayîşanê Kultur û Ziwanî ya Mezopotamya (MED-DER) Şîlane Elmasa ke eşkerayîye wende, ard ziwan ke ziwanê dayîke meşrû yo û xeta sûr a kurdan o û vat eke destûrê mîtîngan nêro dayene ê do rayraşîyayîş bikerê.