Wekîla HDPyî ya Amedî Semra Guzel derheqê hêrişanê dewleta tirke yê vera goristanan de qisey kerd. Semra Guzel îfade kerd ke hêrişê vera cenazayan, hêrişê vera heqê definkerdişê cenazayan û hêrişê vera heqê şînî yê merdiman dewam kenê. Semra Guzel vist vîrî je heqê definkerdişê cenaza û şînî hetê exlaqî ra zaf girîng o û labelê dewleta tirke pê nê hêrişanê xo peymana Cenevre û peymananê mîyanneteweyîyan bin pay kena.

Semra Guzel vat: ''Cenazayê Goristanê Xerzanî rixmo ke tesbît bîyo aîdê kamî yê keyeyanê ci rê nêdîyayî û kişta rayîrî ya Goristanê Kîlyosî de mîyanê kutuyan ê plastîkan de ameyî definkerdene.  Merdimîye de exlaq de, wijdan û huqûq de cayê nê kerdişî çin o. Bi nê hawayî merdimanê nê cenazayan rê zî îşkence yeno kerdene.

Pê bahaneya 'nuşteyê kurdkî' kerrayê goran rijîyenê. Eke na bahaneya hukmatî huqûqî ya çira teberê welatî de zî goran xera keno? Nê hêrişê pêro dişmenîya kurdan ra yenê kerdene. Keyeyan rê îşkence kenê, derheqê înan de tehqîqatan kenê. Êyê ke hêrişê goran kenê wazenê vîr û hîşê şarê kurdî çin bikerê. Na polîtîkaya bêqîymetkerdişî ya. Bi nê hawayî şarî rê vanê 'Eke ti têkoşîn bikere, xo ver bide û muxalîf bibe hînî ma do heqê gorêkî zî nêdê to.' 

Mayê Şemeyî bêgor ê. Cenazaya gerîlayî pê posta erşawîyena, cenazaya dayîke Taybete bi rojan rayîr de vera dîyena, cenazaya gerîla Haci Lokman Bîrlîkî peyê panzerî kirişîyena. Nê hêrişê pêro vera nasnameyê kurdan ê, polîtîkayê qirkerdişî yê. Bi nê hawayî xîret kenê ke şarê kurdî nasname, têkoşîn û xoverdayîşê xo ra cîya bikerê. Gorê Şêx Seîd û Seyîd Rizayî zî çin ê. Labelê ma wayîrê têkoşînê înan vejîyenê. Mayê Şemeyî her çiqas gorê domananê înan çinbê zî wayîrê erjanê xo vejîyenê. Yanî hukmat pê na polîtîka nêeşkeno şar erj û têkoşînî ra cîya bikero.''