Serê sînorê Vakur û Rojhelatê Kurdîstanî de Qereqolê Meydanî yê dewleta tirke esto. Serê sînorî de Çaldiran de 27, Elbak de 30, Qelqelî û Saray de 20 kalekolî virazîyayî. Her roje bi seyan leşkerî serê sînorî de gêrenê.

Dewleta tirke nika zî plan kena ke serê sînorî de desî virazê û têkilîya Vakur û Rojhelatê Kurdîstanî bibirna. Serê sînorî de serra peynîye de 7 kesî, mîyanê 20 serran de 124 kesî pê îdîaya bazirganîya serê sînorî kişîyayî. 

Wekîla HDPyî ya Wanî derheqê dêsan de qisey kerd û pare kerd ke mabênê kurdan de sey Sedê Çînî bendî virazîyenê. Orhane vist vîrî ke serê sînorî de 5 metreyan de yew qereqolî estê û vat:

''Sînor bi şewe û roje pê teyarayan yeno teqîbkerdene. Pê îdîaya asayîşî xendekî virazîenê la merdim û heywanî dekewenê nê xendekan. Wezîrê Karanê Zereyî vano ê do nêverdê çew sînorî ra derbaz bibo la bi hezaran afganî tira derbaz benê. Nê afganî mexdûr ê, xora bêrê. La îqtîdar nê multecîyan şuxilneno. Pê nê dêsî mabênê kurdan de sînorî nîyenê ro. No zî dişmenîya vera kurdan eşkera keno.

Serra peyêne de 7 kesî bi îdîaya qeçaxçîye ameyî kiştene. La her kes zaneno ke ê 7 ciwanan pêzê xo çarnayêne. Dewlete kurdan rê cayêk  nêverdena, nêverdena kurdî bazirganîye bikerê heta selam bidê yewbînan. Erdê Kurdîstanî 100 serrî verî ame parçekerdene, nika zî wazenê nê parçekerdişî derbazê safhayêka newîye bikerê.''