Dêrsim de wendekara Zanîngehê Munzurî Gulîstane Doku ra 203 rojan ra nata xeberêke nêna girewtene. Tehqîqat de cigêrayîşê pisporî yê derheqê dîmenanê peyênan ê Gulîstane de qedîya. 

Raporê cigêrayîşê pisporî de nê çîyan ca girewt:

 -Dîmenanê kamera de yenê dîyene ke mabênê Gulîstane û Abarakovî xoşeberêka tabîye çin a û têgêrayîşê dest û linganê Abarokavî yenê manaya 'hîşyarî.

-Zaynal Abarakovî a kafe de ke Gulîstane tede xebitîyayêne, Gulîstane reyde pêvînayîş kerd û verê nê pêvînayîşî zî 3 xebatkaranê bînan ê kafe de zî qisey kerd. Nê cinîyî beno ke sey 'şahîd' daxîlê tehqîqatî benê.

-Vînbîyayîşê ci ra rojêke verê cû Zaynal Abarakov pê zorî Gulîstane beno cayêk û uja de derb keno. Tay polîsî şinê cayê serebûtî û nê polîsan ra yewî xebere dano babîyê Abarakovî. Babîyê Abarakovî zî polîs o.

Avûkatê keyeyê Gulîstane Alî Çîmenî îfade kerd ke beno ke na têkilîya polîsan ra dima Abarakov nêame destbendkerdene û cinîyê ke kafe de xebitîyenê tewr îfadeyê înan nêame grewtene. Alî Çîmenî da zanayene ke nê detayî yenê mîyankerdene.