Serekê Pêroyî yê Partîya Komunîste ya Kurdîstanî (KKP)  Sînan Çîftyurekî derheqê hêrişanê îşxalî yê dewleta tirke, tewirê PDKyî û babeta yewîya neteweyîye de qisey kerd.

Çîftyurekî vist vîrî ke Tirkîya pê bahaneyan verî zî Rojawan îşxal kerd û vat: ''Tirkîy wazena Kurdîstan de xo mende bikera. Çîyo ke nika Tirkîya Başûr de kena îşxal o. Tewirê Tirkîya û Îranî yê vera kurdan qetî nêvurîyeno. Bi taybetî Tirkîya nika wazena mabênê kurdan de birakujî veja. Bi serran o Tirkîya peyê provakasyonan de ya, wazena Rojawan de yewîya kurdan xera bikera û Başûr de zî birakûjî veja. Ganî ma vera nê kerdişanê Tirkîya yewîya xo awan bikerê.''

Çîftyurekî eşkera kerd ke ganî pêro partî, dezgeh û sazgehê kurdan vera birakujî tewirêk bigêrê û vat: ''Ez venga hukmatê Herêma Kurdîstanî û selahîyetdaranê kurdan dana ke verê şerê zereyî bigêrê.''

Çîftyurekî vera astengkerdişê Heyetê Haştîye zî nêrazîbîyayîşê xo mojna û vat: ''Ganî hukmatê Başûrî no heyet asteng nêkerdêne. Ganî çeka tewr pîle ya Başûrî vera îşxalî bêra şuxilnayene. Ganî Başûr û Rojawan demokrasî bipawê.

Kurdan vera birakûjî peymanêke îmza kerde û çarçewa na peymane de PKK Başûr de ca bîyo. Xora heqê serwerîye ê pêşmergeyan o. La gerîlayî 33 serrî yo uca de yê. Ganî kurdî nê meseleyan û pêro meseleyanê bînan pê dîyalogan çareser bikerê.

Çek û cebilxaneyo tewr girîng ê kurdan yewîya neteweyî ya û ganî hukmatê Başûrî vera îşxalê mendeyî yê Tirkîya vejîyo. Şerê zereyî do zerarêkê pîlî bido kurdan. Statuyo nikayên zî do destî ra şoro. Coka yewîya neteweyîye seba kurdan elzem a.''