DEM Partî Wan, Bedlîs, Îdir û Agirî de xebatanê weçînayîşan rê dewam kena. Herêma Serhedî de goreyê serranê bînan hûmara cinîyanê ke seba namzetîya namzetan muracatê DEM Partî kerdo, zêdîyaye.

Vervatoxê Komîsyonê Qebulkerdişê Namzetan Delîl Aksoyî da zanayene ke Wan de 681 kesan seba namzetîya namzetanê şaredarîyan, meclîsanê şaredarîyan muracat kerdo û nînan ra 76 cinîyan seba endamîya Meclîsê Şaredarîye, 47 cinîyan seba hemşaredarîya qezayan û 11 cinîyan zî seba hemşaredarîya Wanî muracat kerdo.

Vervatoxê Komîsyonê Kerem Çitanakî yê Mûşî pare kerd ke seba Meclîsê Pêroyî yê Mûşî 14 muracatî ameyê kerdene û nêmeyê nînan cinî yê.

Vervatoxê Komîsyonê Qebulkerdişê Namzetan ê Îdirî Şebap Çelîkî pê hesna ke seba Hemşaredarîya Îdirî 17, seba endamîya Meclîsê Şaredarîye 26, seba Meclîsê Pêroyî yê Îdirî 11 kesan muracat kerdo.

Vervatoxê Qebulkerdişê Namzetan ê Bedlîsî Emre Derseyî pare kerd ke qasê 73 kesan muracatê înan kerdo û 11ê nînan cinî yê.

Vervatoxê Qebulkerdişê Namzetan ê Agirî Yildirim Demîrî dîyar kerd ke heta nika 61 kesan muracatê înan kerdo û 32yê nînan cinî yê.