Endamê Komîteya Rayberdişî ya PKKyî Murat Karayilan bi meymanê bernameyêkê Stêrk TVyî. Karayilanî vizêr beşê yewinî yê bernameyî de nê ercnayîşî kerdî:

''Ez sere de pêro seyrkeran rê selam û hûrmetê xo pêşkêş kena. ''Hemleya 1ê Hezîrane Hemleya 15ê Tebaxe ra dima hemleyêka tewr giranêr a û a Hemleya 15ê Tebaxe ya diyîn a. Prosesê tarîxîyî de pê na hemle Têkoşînê Azadîye yê Kurdîstanî de dewirêko newe dîya destpêkerdene. Nika ma serrgêra 16. ya Hemleya 1ê Hezîrane de ya. Serrgêra 16. ya na hemle ya Rayber Apoyî, şarê Kurdîstanî, ê hezanê demokrasîyî û embazan fîraz kena. Na hemle de heta nika ma zaf şehîdî dayî. Ez şexsê Erdal, Adil, Nûda, Helmet, Delal Amedan de şehîdanê na hemle pê mînet yad kena û ma sozê xo reyna dibare kenê. Ma rayraşîyayîşê azadkerdişê Rayber Apo û Kurdîstanî de do vîrameyîşê nînan pê têkoşînê xo bidê ciwîyayene.

Hemleya 15ê Tebaxa 1984î verê qirkerdişê kurdan girewt coka hemleyêka tarîxî ya. Heman wextî de na hemle 15 serran de şorişê xoverdayîşî ard ca, ruhê yewîya neteweyî û çareserîya demokratîke xo reyde awan kerde. Dima Rayberê ma pê komploya mîyanneteweyîye sey esîr ame girewtene. La Rayberîya ma çareserîye ra fek vera nêda û serra 93î de xîretê çareserîye aver berdî. Nê esasî ser o serra 1999î ra heta 2004î ma şerê bi çekan vindarna. Ma hêzê xo Vakurî ra apey antî Başûrî. Vakur de tay hêzê ma mendî. La reyna zî dewleta tirke ya îşxalkere apey gamêke nêeşte. Eqsê ci waşt ke ma tasfîye bikera, şarê ma qir bikera. Heta dewleta tirke vat ke 'Ma Ocalan tepişt, hînî no gure qedîya, ma ser kewtî.' Dewleta tirke nê esasî ser o têkilîya xo ya pê Vakurê Kurdîstanî vindarnaye. Erdogan ame îqtîdar û vat 'Eke ti nêfikîre meseleya kurdan çin a.' Hemleya 1ê Hezîrane serra 2004î de vera asîmîlasyon, qirkerdiş, dewamkerdişê komploya mîyanneteweyîye kewte dewre. O çax KONGRA-GELî kongreya xo ya diyîne de na bire girewte û na bire pratîze kerde.

Hemleya 1ê Hezîrane seba azadî û çareserîye bîye. Ma çarçewa na hemle de tim berê xo dîyalogan ra kerd a. Pê şerêkê aktîfî nê pê pawitişêk dişmenan rê mesajê 'Şima nêeşkenê ma çin bikerê, seba çareserîya meseleya kurdî bêrê' da. Yanî hemle armanc kerd ke dişmenî masa de ronişê û bi nê hawayî çareserîya demokratîke bêra rojdem. Xora armanco tewr girîng ê na hemle pûçkerdişê komplo bi. Dewleye neçare mende ke masa de ronişe. Seke yeno zanayene hîrê serran Oslo de heyetê ma dewleta tirke reyde tay pêvînayîşî kerdî. Dewleta tirke nê pêvînayîşî wedaritî û waşt ke prosesêkê neweyî bida destpêkerdene. Bi nê hawayî serra 2011î de reyna vera ma dest pê hêrişan kerd. Ê nêeşkîyayî planê xo bîyarê ca çunke Rojhelatê Mîyanênî de bi nameyê 'Wisarê Ereban' şerî dest pêkerdbi. Dima dewleta tirke Rayberê Apoyî reyde pê tewrbîyayîşê HDPyî zî 2 û nêm serre pêvînayîşî kerdî. Rixmo ke hayîya ci pê estbî Erdoganî vat ke hayîya mi pê çin a û masaya dîyalogan rijnaye. Tîya ra zî yeno famkerdene ke dewleta tirke îradeyê şarê kurdî qebul nêkena, wazena şarê kurdî kole bikera û şarê kurdî tirk bibo. Dewlete waşt ke şerê herême ra îstîfade bikera la serra 2012î de neçare mende ke adirbirnayîş qebul bikera.

Welhasil ame famkerdene ke dewleta tirkan nêwazena ke şarê kurdî reyde têkilîyêka wayûbirayî biviraza. Dewlete Ewropa û DYA de partîya ma viste lîsteya terorî. La Hemleya 1ê Hezîrane ya serkewte meseleya kurdan berde rojdemê dinya û xeylêk tesîrê Başûrê Kurdîstanî zî kerd û na hamle deskewteyê Başûrî pawitî. Çunke dewleta tirke ma reyde şer kerdêne, ma ra nêbîyêne do hêrişê Başûrê Kurdîstanî bikerdêne. Reyna pê na hemle Şorişê Rojawanî ame caardene. Netîceya Hemleya 1ê Hezîrane de vera DAÎŞî şerêko hîra ame kerdene û şarê kurdî Rojhelatê Mîyanênî de bi hêzêr. Hemleya 1ê Hezîrane bi nê hawayî ser kewte. La dewlete hema zî wazena şarê kurdî qir bikera. Coka hema zî mabênê xeta çareserîya meseleya kurdan a Rayberîye û polîtîkaya qirkerdişî ya rejîmê Ergenekon, AKP-MHP-Partîya Vatanî de şer dewam keno. Serra 17. ya Hemleya 1ê Hezîrane de no şer bi hawayêkê bihêzêrî do dewam bikero.

Artêş û dewleta tirke ya ke wayîrê hîşmendîya kemalîzmî ya vera gerîlayan bin kewte. Serra 2012î de artêşa tirke nêeşkîyaye erzak bêra Taburê Orêmarî û nêeşkîyaye debikewe xeylêk koyanê Kurdîstanî. Dewlete seba ke teng bibî serra 2012-2013î de neçare mende ke ma reyde dîyalogan bikera û adirbirnayîş îlan bikera. Dewleta tirke no proses seba amadekarîya şerî xebitnaye. Xora wextê adirbirnayîşî de hêrişê Rojawanî kerd û uja de DAÎŞ vist dewre. Pê paştdayîşê gladîyoyê NATOyî serra 2015î de dewlete konseptêko newe amade kerd. Pêro hetê sey AKP, MHP, Partîya Vatanî, CHPyî vera estbîyayîşê kurdan ameyî pêser û no konsept aferna. Nika artêşa tirke nê, îstîxbarat, fermandarîya hewayî û hêzê paramîlîterî vera ma şer kenê. Panc serran ra nata bi nê hawayî hêrişê dezgehanê kurdan ê kulturel, çapemenîye û sîyasîyan kenê. Hedefo merkezî yê nê şerî Îmrali yo. Dewlete waşt ke pê şîdetî şar teslîm bigêra. La rixmo ke hende îmkanê ci estbî dewleta tirke ser nêkewte. No pê xoverdayîşê Îmraliyî, tewiranê şehîdan û fedakarîya şarê ma ame kerdene.

5 serran ra nata dewlete pê hemleya xo wazena erjanê kurdan bin pay bikera û şarê kurdî bêrûmet bikera. Serra 2016î şexsê Suleyman Bêsoy vatêne ê do PKK çin bikerê. Seba ke şarê ma perwerê Rayber Apoyî yê, vera ey tecrîdêko giran kenê. Reyna domanê şarê kurdî yê bêsûcî erzîyenê zîndanan. Pêro dinya çarçewa pandemîye de zîndanan kena veng. Dewleta tirke zî terefgîrê xo, tecawuzkerî, dizdî, kiştox û cergî vera dayî la kurdê welatperwerî û şorişgêrê tirkî zîndan de terkê mergî kerdî. Na hîşmendîyêka wehşî û nîjadpereste ya. Dewlete hêrişê şehîdgehan kena, kerrayanê goran şiknena, şehîdgehanê Başûrî ser o bombayan varnena. Rejîmê Ergenekon û Partîya Vatan-MHPyî hînî kurdê merdeyî zî qebul nêkenê. Wazenê kurdî teslîm bibê û javê 'Ez parçeyêkê tirkan a.' Na hîşmendîyêka şîzofren a. Eke wina nêbîyêne çira esteyê merdiman şehîdgehan ra benê heta Îstanbulî û kişta rayîrî de kenê binê erdî?

Dewlete seba ke kurd ê, hemşaredaran qebul nêkena û herinda nînan de qeyûman tayîn kena. Înan ra têna paştdayîşê nîjadperestan bes o coka hêrişê kurdan kenê, mîyanê komelî de faşîzm pîl kenê. Erdogan nika anketan dano kerdene. Key netîceyî sey waştişê ci bivejîyê do weçînayîş bido kerdene. Erdogan wina fikirîyeno ke o çend nîjadperestîye geş bikero rayê ci hende zêdîyenê. Coka qeyûman tayîn keno, hêrişê şehîdgehan keno û tecrîd keno giranêr. No tecrîd têna vera Rayberîye nê vera şarê kurdî û şaranê Tirkîya yo. Wahşeto ke AKP-MHP keno heta nika nêame dîyene.

Rejîmê AKP-MHPyî vera cinîyan ê kurdan û sîyasetê kurdan zaf bihêrs o. Nika pê felsefeya Rayber Apoyî cinîyan ê kurdan têna Tirkîya yan zî Vakurê Kurdîstanî de nê dinya de rolêko aktîf girewt xo milî. Cinîyê kurdî zor danê înan, ê eşkenê tay çîyan bivurnê û temsîlê îradeyêkî kenê.

Tewr peyên nînan aktîvîstê Komeleya Cinîyan a Rosa tepiştî. Ça de yew cewher dînamîk estbo nê hêrişê ci kenê. Eke heta ewro nê şarî xo ver dayo, ney de rolê cinîyan pîl o. Cinîyî Têkoşînê Azadîye yê Kurdîstanî weye kenê. Nê pê na raştîye hêsîyayî coka hêrişê cinîyan ê kurdan kenê. Nika zî ê her kes pê êndamîya rêxistine sûcdar kenê yanî qala ma kenê. No zûrêko pîl o. Qadro û endamê ma koyan de yê. Dewleta tirke ters verî ra wina têgêrena. Nê bin kewtî. Na rewşa zî nîşaneya înan a binkewtişî ya. Bika tena armanc kenê ke komel wa teslîm bibo. Wazenê ka wa HDP Meclîs de nêbo. HDP bi merkezê demokrasîyî. Eleqeyê ma pê îna n çin o. HDP welatperwerî û demokrasî temsîl keno. Wazenê ke HDP bitersnê, rayanê ci kêm bikerê û Meclîs û şaredarîyan ra bierşawê û bi nê hawayî teslîm bigêrê. Sey terefgîranê Fettullah Gulenî ke ê pêro bîyî ajan. La HDP û sîyasetê kurdan ra ajanî nêvejîyenî. Ê do ser nêkewê, şarê kurdî teslîm nêgêrê. Do nêeşkê pê tecrîdê vera Îmraliyî netîce bigêrê. Çunke hînî têkoşînê demokrasî û azadî yew îrade yo. No îrade ewro zîndanan û kuöeyan de zî yeno temsîlkerdene. Cinîyan rê ke seba têkoşînê azadîye têkoşîn kenê selam bo. Selam bo ê kesan ke Tirkîya de vera rejîmê faşîstî têkoşîn kenê. ''