Endamê Komîteya Rayberdişî ya PKKyî Nedîm Sevenî derheqê Komployê 9ê Teşrîna Verêne ya 1998î û îşxalê dewleta tirke yê vera Başûrê Kurdîstanî de ANFyî rê qisey kerd.

Qiseykerdişê Sevenî ra tay noqtayê girîngî wina yê:

''Rayber Apoyî tim seba yewîya neteweyîye xîret kerd. Têgêrayîşê ma û Rayberîye mabênê serranê 2013-2015î de seba awankerdişê kongreya yewîye pêşnîyaz kerd û waşt ke Mesûd Barzanî zî bibo serek. La Barzanîyan no nêwaşt û îxanet weçîna. Hema zî ma seba yewîye xîret kenê. Dewleta tirke qetî nêwazena ke partîyê kurdî yew bibê. PKK 50 serrî yo wayîrê erjanê Başûrî vejîyeno. Mam Celal, Mihemed Emîn Pencewînî û sey nînan kesanê bînan ê başûrijan Rayber Apo de dostîye kerde. Rayber Apoyî seba ke Başûr de demokrasî aver şora gamê pîlî eştî. Çunke Rayber Apo hema serranê 90an de pê hesîyabi ke Barzanîyî Başûr de demokrasî nêwazenê û îdareyê xanedanîye nanê ro. 

Ewro dewleta tirke bi destekê PDKyî hêrişê Rojawan, Şingal, Mexmûr, Kerkûk, Silêmanî û Hewlêrî kena. PDK seba pereyan şarê xo roşeno. Ganî şarê Kurdîstanî vera ney tewir bimojno. Ciwanê Başûrî sîyasetê Barzanîyan ra pêl bi pêlî şinê Ewropa. Wextê Komployê Mîyanneteweyî de Silêmaniye, Hewlêr, Kerkûk, Behdînan, Soran de bi mîlyonan merdimî weriştî payan ser û wayîrê Rayber Apoyî vejîyabi. Reyna Başûrî ra sey embaz Helmetî bi hezaran ciwanî tewrê gerîlayan bîyî. Ganî şarê Başûrî nê tewirê şehîdan xo rê bikero esas. 

Senî şarê ma Başûrî prosesê komployî de wayîrê Rayber Apoyî vejîya ganî nika zî heman tewirî bimojno û bi ruhê yewîya neteweyîye vera îşxalê dewleta tirke têbigêro. Ciwanê Başûrî Ewropa de se kenê? Wa abigêrê û erdê xo bipawê.

Serrgêra 25. ya Komployê 9ê Teşrîna Verêne de ganî ma azadîya Rayber Apoyî bîyarê ca û bi nê hawayî peynîya îxanetî bîyarê. Ganî sere de roşnvîrî şarê ma erkanê xo bîyarê ca. Fanî pêro başûrijî tewrê şorişî bibê.''