Şaristanê Silêmanî yê Başûrê Kurdîstanî de serkêşîya Komîteya Abdullah Ocalanî rê Azadîye de çarçewa Hemleya 'Abdullah Ocalanî rê Azadîye, Meseleya Kurdan rê Çareserîya Sîyasîye' de panelêk ame kerdene. Panelê bi nameyê 'Konfederalîzmo Demokratîk Çareserîya Haştîye û Pîyaciwîyayîşê Şaran a' de Dr. Hekîm Abdulkerîm, Berpirsîyara Dîplomasî ya KJARî Rozerîne Kemanger, nuştox û aktîvîst Adîl Osmanî qisey kerd.

Dr. Hekîm Abdulkerîmo ke Endamê Komîteya Abdullah Ocalanî rê Azadîye yo, qiseykerdişê xo de bale ante krîzanê herême ser û vat: ''Nê krîzan ra tek rayîrê xelisîyayîşî paradîgmaya Birêz Ocalanî ya.''

Berpirsîyara Dîplomasî ya KJARî Rozerîne Kemanger vat: ''Komel de cinîyî raştê qirkerdişî yenê. Ewro serkêşîya PKK û gerîlayan ê cinîyan de cinîyî hîna zaf wayîrê hişmendîya azadîye yê. Îran û Rojhelatê Kurdîstanî de dormeyê sloganê 'Jin, Jiyan, Azadî' de yew şoriş qewimîyeno. No slogano ke berhemê Abdullah Ocalanî yo ganî pêro dinya rê bêro vilakerdene.''

Nuştox û aktîvîst Adil Osmanî vat: ''Ganî ma hişmendîya dewletperest û nîjadperestî ya Başûrî ser o vinderê. Seba ke çareserîye pêşkêş keno vera Birêz Ocalanî hêrişî yenê kerdene û o yeno tecrîdkerdene. Ganî vera kurdayetîya Başûrî ya klasîke neteweya demokratîke bêra averberdene.''

Panel beşê pers û cewaban ra dima qedîya.