Bi hezaran kesê ke tede temsîlkarê sîyasîyî zî estbî, vera hêriş û îşxalê dewleta tirke seba rayraşîyayîşêkê girseyî Baxê Giştî yê Silêmanî de kom bîyî. Helebçe, Kerkûk, Îdareyê Germîyan, qezayanê Derbendîxan, Çemçemal û Pênciwênî ra zî hemwelatîyî beşdarê çalakîyî bîyî. Girseyî waşt ke ver bi Seraya Silêmanî şoro la hetê polîsan ra semedê tedbîranê vîrusê Korona ra ame astengkerdene. Rayraşîyayîşî ra verî mabênê polîsan û hemwelatîyan de alozîye qewimîyaye. Hêriş de 20 hemwelatîyî birîndar bîyî.

Hemwelatîyî bi israr astengîya polîsan derbaz kerde û ver bi Cehdeyê Seholeke dest pê rayraşîyayîşî kerd. Endama Heyetê Rayberdişî yê Têgêrayîşê Azadîye Nerîmane Ehmed eşkerayîyêke daye û vat: ''Eke hêzê hemkarî nêbîyêne dewleta tirke nêeşkîyayêne hende hêriş bikera.''

Hemsereka Têgêrayîşê Azadîye yê Herêma Silêmanî Şehêne Mihemed eşkerayîya Komîteya Amadekarîya Çalakîye wende. Eşkerayîye de wina ame vatene: ''Vera îşxalan nîşandayîşê tewir û nêrazîbîyayîşî wezîfeyêko merdimî, exlaqî û neteweyî yo.''

Nameyê Koma Wijdanî ser o zî Dilşad Mîranîyî wina vat: ''Seba pawitişê Başûrê Kurdîstanî û şarî ganî ma seferber bibê.''

Nameyê Komîteya Mehelî ya Hizba Şûî ya Kurdîstanî ser o Osman Zindanîyî vat: ''Wezîfeyê Îdareyê Herêma Kurdîstanî yo ke şar û herême bipawo.''