Qezaya Silopî ya Şirnexî de serkêşîya Mayanê Haştîye de vera îşxal û xayînîye çalakîya ameye kerdene.

Hemserekê Pêroyî yê KCKyî Berdan Ozturk, Hemserekê Pêroyî yê DBPyî Salîha Aydeniz û Keskin Bayindir, wekîlê HDPyî Nurane Îmîr, Hasan Ozguneş, Remzîye Tosun, Ayşe Surucu, Siddik Taş, aktîvîstê TJA, Mayê Haştîye, îdarekarê HDP û DBP û bi hezaran kesê ke Mêrdîn, Sêrt, Êlîh û Amedî ra bajarekê Tilqbînî yê qezaya Silopî ya Şirnexî  de ameyî têhet semedê protestokerdişê  hêrişê îşxalî yê AKP-PDKyî yo ke 17ê nîsane de vera Herêmanê Pawitişî yê Medya dîya destpêkerdene ver bi Berê Sînorî yê Xabûrî rayra şîyî.

Rixmê astengkerdişê leşkeranê tirkan şar bi pankarta “Li hember ixanet û dagirkeriyê , emê xaka pîroz biparêzin, bijî berxwedana rumetê”  dest pê rayraşîyayîşî kerd. Rayraşîyayîş de bi slogananê “Bimre îxanet” ve “Bijî berxwedana Zapê” hermkarîya PDK û AKPyî ameye şermezakerdene. Badê rayraşîyayîşî eşkerayîye ameye dayene.

Mayanê Haştîye ra Emîne Ozeke vat: ''Mesût Barzanî kurdan ra çi wazeno! Heta çiwext do paştî bido zaliman? No îxanet hema çend do dewam bikero? Ma benê yew, ê dest pê şerî kenê, pê tankan dopan hêrişê qicanê ma kenê. Qicê ma qey koyan de yê? Mesût Barzanî ti nêşarmîyenî? Hinî bes o, xayînîye caverde û kişta şarê xo de vinder.''

Salîha Aydeniz vat:  ''Îqtîdarê AKP-MHPyî pê hêrişê vera Kurdîstanî wazeno payra bimano. Çar leteyanê Kurdîstanî de kurdî raştê hêrişan yenê. Ma çend vanê wa kurdî bibê yew PDK keno ke kurdan çîn bikero.  Vindertişê înan vindertişêko kurdîstanî nîyo.  Şarê kurdî do teberê PDKyî de yewîya xo rone.  Ganî şarê Başûrê Kurdîstanî wayîrê statuyê xo yo ke pê keda pîle ame destfînayene, vejîyo. No şerê vera statuyê Başûrê Kurdîstanî yo. Ma hêrişanê vera Şingal, Mexmûr û Başûrê Kurdîstanî şermezar kenê. Ma do qetî destûrê şerî medê.''

Berdan Ozturkî zî vat: ''Ma tîya ra bi nameyê Vakurê Kurdîstanî veng danê. Ganî PDK û Başûrê Kurdîstanî vengê ma bieşnawê. Kurdîstan pê destê hêzanê serdestan bi çar lete la Kurdîstan yew yo.  Artêşa tirke ya faşîste bi hetkarîya PDKyî Kurdîstanî îşxal kena. No çîyo xelet o û ma do qebul nêkerê. PDKyo ke sey memûrêkê AKPyî têgêreno nêeşkeno şarê kurdî temsîl bikero. Şima kewtê mefeatanê xo dima. Statuyê Başûrê Kurdîstanî statuyê keyeyê Barzanî nîyo, statuyê kurdan û Kurdîstanî yo.  No operasyon nîyo, îşxal o. Kurdî do çirey qebul mekerê. PDK ganî na xeletî ra agêro. Erdogan dostê şima nîyo. Oyo ke Vakur de zulm keno nêeşkeno Başûr de bibo dost.''