Amed de partîyê sîyasîyî û rêxitinê komelê sîvlî yê ke serkêşîya Komeleya Cigêrayîşanê Kultur û Ziwanî ya Mezopotamya (MED-DER) de Meydanê Şêx Seîdî de ameyî têhet, waşt çarçewaya 15ê Gulane Roşanê Ziwanê Kurdkî de vilawekan vila bikerê la polîsan destûr nêda.

Şarî astengkerdişê polîsan bi sloganan protesto kerd. Şaro ke ablûqaya polîsan ra ravîyart veng da şarê bajarî da ke wa tewrê aktîvîteyanê Roşanê Ziwanê Kurdkî bibê. Hemserekê MED-DERî Remzî Azîzogluyî ard ziwan ke ewro Komeleya Kulturî ya Dicle de programêkê înan es to û aktîvîteyê înan do dewam bikerî.

Hemvervatoxa Komîsyonê Kultur û Ziwanî yê DEM Partî Cemile Turhalli zî vat: "Aktîvîteya ma ameye qedexekerdene. Eke ziwanê ma qedexe yo, şarê ma zî qedexe yo. Waştişê ma azadîya ziwanê şarê ma yo. Ma her cayê biaçarnê kurdkî."

Badê eşkerayîye kuçeyanê Sûrî de rayraşîyayîş ame kerdene û veng dîya şarî ke wa tewrê aktîvîteyan bibo. Rayraşîyayîş de deyîrê kurdkî ameyî vatene û sloganê sey "Ziwanê ma rûmetê ma yo" û "Bê ziwanî cuye nêbena" ameyî vatene.