Tabelaya kudkî ra vera Şaredarîya HDPyî tehqîqat
Tabelaya kurdkî ya ke wextê Şaredarîya Qelqelî ya HDPyî de amebî amadekerdene, verî wedarîyaye dima zî bi îdîaya 'fîrmayêka rêxistine tabela viraşta' vera Şaredarîye tehqîqat ame akerdene.
Wan de Şaredarîya Qelqelî ya HDPyî 2019 de tabeleya kurdkî ya bi nuşteyê 'Hûn Bi Xêr Hatin' (Şima xêr ameyî' amade kerdbî. La Îdareyê Rayîran bi bahaneya 'xebatanê rayîrî' nêverda ke tabela bêra daliqnayene. Dima tabelayî hetê qeyûman ra erzîyayî depoyan.
Dima dewlete derheqê Hemşaredarê ê çaxî Yakup Almaçî û fîrmaya tabelayan de bi îdîaya 'zerar dîyayo malê umûmîye û têkilîya fîrma bi rêxistine est a' dewa akerde. Almaçî par zîndanî ra vejîyabi û ard ziwan ke Mudirîya Herême ya Rayîran daliqnayîşê tabelayan asteng kerdo.
Almaçî da zanayene ke derheqê tabelayan de vera înan tehqîqat ameyo akerdene û vat: ''No tehqîqat raştîyan ra dûr o û sîyasî yo. Wexto ke îdîaname amade bibo ma do agahîyan bidê komelî.''
