Îdarekarê Merkezê Huqûqnasanê Seba Azadîye (OHD) Avûkat Berdan Acunî tecrîdê vera Rayberê Şarê Kurdî Abdullah Ocalanî û grevê vêşanîye yê tepişteyan ajansê ma rê ercnayî.

Acunî pare kerd ke tepişîyayîşê Rayberê Şarê Kurdî ra dima Zîndanê Îmraliyî seba tecrîdî ame amadekerdene û vat: ''Tecrîd verî vera Birêz Ocalanî ame kerdene û dima pêro Tirkîya de sey metodêk ame ceribnayene û pêro komelî ra zî ame vilakerdene. Sebebê tecrîdê vera Abdullah Ocalanî polîtîkaya çaresernêkerdişê meseleya kurdan a. Pê tecrîdî yeno armanckerdene ke çew meseleya kurdan ser o nîqaş nêkero. Sîstemê tecrîdî yê Îmraliyî maneno sîstemê Guatemola. Tede huqûq çin o û zîndan pê keyfê hukmatî yeno îdarekerdene.''

Acunî nêzdîbîyayîşê CPTyî zî wina ercna: ''CPTyî 2019 de wexto ke Îmrali zîyaret kerd eşkera kerd ke tede îşkence û tecrîd estê.  La naye ra ber çîyêk nêkerd. CPTyî seba ke tecrîd biqedo Tirkîya rê teda nêkerde. Her roje bi nê hawayî tecrîd beno xorinêr.''

Acunî peynîya qiseykerdişê xo de grevê vêşanîye yê tepişteyan vist vîrî û vat: ''Ma sey pawitoxanê heqanê merdiman û huqûqnasan çalakîya winasêne tercîh nêkenê. La pêro rayîrê huqûqî girewte yê û çalakîyanê winasênan ra ber rayîrêk nêmend. Grevê vêşanîye yê 2018î de 8 tepişteyan dinyaya xo bedilnaye. Ma pê hêvîdar ê ke narey verî ke erey bo waştişê tepişteyan yenê caardene. Ma hukmatî dewatê huqûqî kenê. Ganî Birêz Ocalan û pêro tepişteyî heqanê xo bişuxilnê.''