Gerîlaya YJA Starî Berîvane Mervan polîtîkayê ke şexsê Ocalanî de vera şarê kurdî yenê caardene, ANFyî rê ercnayî. Berîvane Merwan vist vîrî ke dewleta tirke wextanê peyênan de xîret kena ke Başûrê Kurdîstanî de sîstemê qiricîtîye awan bikera û îfade kerd ke şarê kurdî û têgêrayîşê azadîye prosesêkê girîngî de yê.

Berîvane Merwan vat: ''Tecrîdo girankerde yê vera Rayber Apoyî dewam keno. Dewleta tirke û hêzê hegemonîkî hêrişê şarê Kurdîstanî, ziwan, kultur û xozaya Kurdîstanî kenê. Hêrişê vera Heftanînî zî tecrîdî ra cîya nîyê. Dewleta tirke wazena sere de Başûrê Kurdîstanî pêro herême îşxal bikera.

Dewaya heqdare ya şarê kurdî do ser bikewa. Dewleta tirke do nêeşka şarê kurdî nê erdî ra cîya bikera. Xoverdayîşê Heftanînî îsbatê ney o. Dewleta tirke pê pêro îmkananê xo hêrişê Heftanînî kena. Dewleta tirke Başûr de sîstemê qoricîtîye awan kena û xîret kena ke kurdî yewbînan reyde şer bikerê. Wa kes pê polîtîkayanê dewleta faşîste mexapîyo. Tay kesî wina xapîyenê û vera ma şer kenê.  Ma nêwazenê ke qoricîyan bikişê la wextê operasyonî de ê do bibê hedefê ma. Ma do nêverdê ke nê merdimî erdê ma biherimnê. 

Ganî ciwanê kurdî xo rê persê ke 'Ma senî eşkenê wayîrê nê erdî bivejîyê?' Rayber Apo bi serran o ke seba azadîya şarê kurdî têkoşîn keno. Ganî her kes têkoşînê Rayber Apoyî ra dersan bigêro. Ma bi têkoşînê hemparî yê şar û gerîlayan ê eşkenê peynîya tecrîdê vera Rayberê Şarê Kurdî Abdullah Ocalanî bîyarê. Ganî ciwanî vajê bes û tewrê têkoşînî bibê.