Seba Şaredarîya Amedî bi rayanê şarî Serra Bucak û Dogan Hatun bîyî namzedê DEM Partî. Hemsereka DEM Partî ya Amedî Pinare Sakik Tekîn ANFyî rê qala verweçînayîşan û tewirê şarî kerde.

Pinare Sakik Tekîn da zanayene ke rixmo ke reya verêne înan verweçînayîş kerdo tecrubeyê pîlî vistî destî. Pinare Sakik Tekîn vat: ''Kêmasîyê ma hetê teknîkî ra est bîyî. Ma do wextanê verê ma de kêmasîyanê xo raşt bikerê. Ma qasê 90 merkezanê Kurdîstanî de verweçînayîşî kerdî. Mayê Haştîye, merdimê tepişteyan, endamê Meclîsanê Cinîyan û Ciwanan, rêxistinê komelê sivîlî verweçînayîşanê ma de xebitîyayî. Şarê ma îradeyêko pîl mojna.''

Tekîne bale ante ser ke bi destê qeyûman Kurdîstan de polîtîkayê şerê taybetî xorinêr bîyê û vat: ''Şarê ma do sindoqan de cewabê rejîmê qeyûman bidê. Ma do şaredarîyanê xo apey bivisnê destî. Ma sey DEM Partî soz danê ke weçînayîşan de wayîrê îrade û destkewteyanê şarê xo vejîyê. Ma do bi ruhê 8ê Adare û 21ê Adare şorê weçînayîşanê 31ê adare. Ma do Kurdîstan de peynîya polîtîkaya qeyûman bîyarê.''