Wekîlê HDPyî Omer Faruk Gergerlîogluyî babeta cigêrayîşê rûtî berdbi rojdemê Meclîsî. Çend hewteyî verî zî Hemşaredara Colemêrgî Dîleke Hatîpoglu Zîndanê Wanî de dekewtişê zîndanî de maruzê cigêrayîşê rûtî bibi. Wexto ke Dîleke Hatîpoglu vera cigêrayîşî vejîyaye gardîyanan ci rê îşkence kerd.

Derheqê na mesele de Hemsereka TUYAH-DERî Kudrete Temel agahîyî dayî û pare kerd ke keyeyî ge ge îfade kenê ke înan rê zî cigêrayîşo rûtî yeno kerdene.

Temele da zanayene ke ê do nê rojan de rayaumûmîye derheqê mesele de agahdar bikerê û vat: ''Têna tepişteyî nê keyeyî zî raştê cigêrayîşê rûtî yenê. Keyeyan muracatê ma kerd. Zeba zelalkerdişê rewşe xebatê ma dewam kenê. Cigêrayîşo rût sûcêkê merdimîye yo. Ma venga keyeyan danê ke eke zîndananê Wanî de cigêrayîşo rût yeno kerdene wa ma rê muracat bikerê. Grevê vêşanîye yê tepişteyan 90 rojî yo dewam keno. Goreyê zanayîşan xoverdayoxanê grevê vêşanîye rê tedayî dewam kenê. Ma naye qebul nêkenê. Ma hetê embazanê tepişteyan de yê.''