Mehmet Alî Ugur 2007 de 'endamîya rêxistine' ra tepişîyabî û erşawîyabi Zîndanê Patnosî. Ugur hetê bînî ra nêweşê çolyakî yo.

Dadîya Ugurî Gulîstane Demîr Ajansê Mezopotamya rê qisey kerd û pare kerd ke Zîndanê Patnosî de kerdişê sey îşkenceyî est ê. Dayîke Gulîstane vat: ''Merdimê ke nêweşê çolyakî yê nêeşkenê her çî biwerê. Lajê mi qiseykerdişê ma yê peyênî de vat 'Tîya de cuye çin a. Dest nîyeno kitabanê ma ser û awa germine nêdîyena ma. Seba şimitişî zî awa tuwaletî dîyena. Ma binê tedayêka girane de yê.

Lajê pêvînayîşê ma de vat ke wa her kes derheqê rewşa tepişteyan de hîsger bibo. Îdare nêverdeno ke ma bi rehetî domananê xo de qisey bikerê. Kênaya mi pê derguşê xo şîbî pêvînayîşî la emzîgê derguşî zî ame vetene. Na dewlete de huqûq çin o. Wa her kes vengê tepişteyan bieşnawo.''