Hetkara Hemserekîya Komîsyonê Şaran û Bawerîyan a HDPyî Tulaye Hatîmogullari û Kongreya Awankerdişê Dêrsimî bi wesîleya serrgêra Qirkerdişê Dêrsimî eşkerayîyê nuştekî weşanayî.

Eşkerayîya HDPyî de ame vatene ke ganî Dêrsim bêro pawitine la ewro tede asîmîlasyonêko pîl esto.  HDPyî waşt: ''Ganî seba Terteleyê Dêrsimî cigêrayîş bêro waştene, cayê gorê Seyîd Riza û embazê ci yê ke 15ê teşrîna peyêne ya 1937î de ameyî dardekerdene, bêro eşkerakerdene, arşîvê 1937-1938î û dokumentê kênayan ê vînîbîyayeyan ê Dêrsimî ser o wa bêrê akerdene. Ganî nameyê Dêrsimî bêro îadekerdene. Ganî nê waştişê şarê Dêrsimî bêrê caardene.''

Kongreya Awankerdişê Dêrsimî vat: ''Bi des hezaran kesî kişîyayî û pê trenan ameyî surgunkerdene. Bi seya keyeyî ameyî vêşnayene, cinîyan rê tecawuz ame kerdene, domanê kênayî keyeyanê xo ra ameyî girewtene û sey 'ganîmet' dîyayî leşkeran. Seyîd Riza û 6 embazê ci ameyî dardekerdene. Êyê ke dêrsim de mendî, maruzê asîmîlasyonêkê pîlî bîyî. Komara Tirkîya Terteleyê Dêrsimî rê dewam kena. No tertele eşkîyeno pê têkoşînêkê xurtî bêro vindertene. Tîya de mesuldarîya her kesî esta. Ma venga şarê xo danê ke saete 19.37 de findeyan tavisno û pê şiwaranê 'Dayê Dayê' û 'Xatir bo to welat' vajê.''