Kongreya Asayî ya 1ine ya Meclîsê Ciwanan ê DEM Partî 24ê kanûne de Amed de do bêra kerdene. Endamê Meclîsê Ciwanan ê DEM Partî Îdrîs Yalçinî derheqê kongre de ANFyî rê qisey kerd.

Îdrîs Yalçinî pare kerd ke dewlete bi pêro hêzanê xo û polîtîkayanê şerê taybetî tim hêrişê ciwanan kena û vat: ''Rîyê nê hêrişan de heyf ke mîyanê ciwanan de bêhêvîtî û qesawetî zêdîyayî. Kongreya ma do vera nê hîsan çareyan bimojna. Ciwanî do zulm û zorbazîye bişiknê. Armancê kongreya ma no yo. Ma bi şîarê 'Vera şerê taybetî xoverdayîşê heybetînî' dest pê amadekarîyanê xo kerd. Dewleta tirke tim kurdî çin hesibnayî. Vera kurdan 100 serrî yo polîtîkayê asîmîlasyon û qirkerdişî yenê kerdene. La kurdî hînî hişyar bîyî û çew nêeşkeno ma mîyanê tarîtîye de war verdo. Ma do bi kongreya xo bimojnê ke cinî û ciwanê kurdî tim payan ser de yê.''

Yalçinî îfade kerd ke bi tecrîdkerdişê Rayberê Şarê Kurdî Abdullah Ocalanî şarê kurdî bi temamî yeno tecrîdkerdene û vat: ''Birêz Abdullah Ocalan seba ma hînî fikr û cu yê. Ma do nînan pêro dinya rê vila bikerê. Embazê ma yê zîndanan bi grevê vêşanîye xo ver danê, dadîyê ma Nobetanê Edaletî de yê. Heta caardişê azadîya Birêz Abdullah Ocalanî ma do têkoşîn bikerê. Ma venga ciwanan, cinîyan û pêro embazanê xo yê têkoşeran danê ke wa tewrê kongre bibê.''