Teyarayanê şerî yê tirkan saete 00:00 ra dima hêrişê Kampa Multecîyan a Şehîd Rûstem Cûdîyî (Mexmûr), Şingal û Herêmanê Pawitişî yê Medya yê Başûrê Kurdîstanî kerd. Şingal de sivîlî birîndar bîyî.
Dewleta tirke ya îşxalkere mîyanê şewe saete 00:00 ra dima vera Şingal, Kampa Multecîyan a Şehîd Rûstem Cûdîyî û Herêmanê Pawitişî yê Medya hêrişê hewayî kerdî. Hêrişê vera Mexmûrî 40 deqayan dewam kerd. Bombardumanî ra dima teyarayê keşfî bi saetan serê herême de gêrayî.
Teyarayanê şerî yê tirkan heman wextî de hêrişê Şingalî, Xanesor û Nêweşxaneyê Serdeştî kerd. Goreyê zanayîşanê destpêkan hêrişê vera Şingalî de birîndarî estê.
Hêrişê vera Mexmûrî 40 deqayan dewam kerd
Hêrişê vera Mexmûrî waranê sivîlan desaete 00:00 de dest pêkerd û heta 00:40 dewam kerd. Koyê Qereçoxî û herêma Miştenûrî ser o bombayî ameyî varnayene. Mexmûr de hêriş vera waranê sivîlan ame kerdene. Roniştoxanê kampe xîret kerd ke pê konvoyêkî xo biresnê waranê ke ci ser o bombayî ameyêne varnayene. Labelê teyarayanê şerî konvoy da bombayan verî.
Goreyê zanayîşanê destpêkan bombardumanê giranî de zerar nêresa kesêkî/e ser labelê axpînê sivîlan û heywanî vêşayî.
Vengê bombardumanî şaristanê Dêrikî yê Rojawanî ra ameyêne eşnawitêne.
Herêmanê Pawitişî yê Medya de zî xeylêk wareyan ser o bombayî ameyî varnayene
teyarayanê şerî yê dewleta tirke xeylêk waranê Herêmanê Pawitişî yê Medya ser o bombayî varnayî. Teyarayanê şerî Koyê Direbî, Kozînî, Balayan, Koyê Nasirî dayî bombayan ver.
Şingal de sivîlî birîndar bîyî
Hêrişê hewayî yê vera Şingalî de sivîlî birîndar bîyî. Muxabîr Îbrahîm Êzidî Stêrk TVyî reyde qisey kerd û da zanayene ke herêma Serdeştî de sivîlî birîndar bîyî. Dewleta tirke Serdeşt de nêweşxaneyêk dabi bombayan ver. Herême de kampêke esta ke Şingalijê ke hêrişanê cerganê DAÎŞî ra dima serra 2014î de koçê na kampî kerdbî.
