Enternasyonalîsta îtalyane Jessica Todaro paştdayîşê hukmatê Başûrê Kurdîstanî yê seba polîtîkayanê Tirkîya sey rewşêka 'tehlukeyîne' name kerde û vat: ''Parçebîyayîşê kurdan xizmetê serdestan keno.''
Enternasyonalîsta îtalyane Jessica Todaroya ke Heyetê Haştîye reyde şîbî Başûrê Kurdîstanî ANFyî rê qala çimdarîyanê xo kerde.
Jessica ard ziwan ke polîtîkaya îşxalî ya tirkan herême rê zaf tesîr kena coka ganî kurdî yewîya xo bîyarê ca. Jessica Todaro îfade kerd ke ê wazenê mabênê partî, rêxistin û dezgehanê kurdan de dîyalogî bêrê kerdene. Jessica Todaro vat: ''Parçebîyayîşê kurdan xizmetê serdestan keno.''
Jessica Todaro bale ante astengkerdişê Heyetê Haştîye ser û da zanayene ke bêvengîya PDKyî ya vera îşxalê tirkan zaf tehlukeyîn a, paştdayîşê PDKyî yê bi Tirkîya seba kurdan felaket o. Jessica venga hukmatê Başûrî da ke vera îşxalî bêveng nêmano.
