Tûyê Baxçeyanê Hewselî pê tehm û pîlîya xo bale ancenê xo ser. Şaristan de xeylêk kesî nê tuyan roşenê û pê debara xo kenê.

Bager Çîçek zî her hewte çend rojan Baxçeyanê Hewselî ra tuyan arê dano û bazaranê şaristanî roşeno.  

Bager pare keno ke ê 8 way û bira yê û keyeyê înan de têna o xebitîyeno. Bager vano: ''Ez zî tuyan roşena. Tay darî berz ê tay darî zî nizm ê. Embazanê ma ra yew şino dare ser, dar kuweno ma zî binê dare de rîpêş akenê. Tay tehlukeyê ci esto xora.''

Bager ano ziwan ke o her roje tewr tay 40 kîlo tuyan arê dano û kîloyê ci zî 10 TL ra roşeno. Bager vano: ''Ma 2 rojan de yew şinê tuyan arê danê. Ma tuyanê eciqnayeyan zî kenê wişk yan zî pê aqît virazenê.''