Vera xespkerdişê şaredarîyanê HDP’yî razînêbîyayîşî her roje zêdîyenê. Hemserekê Partîya Şaran a Demokratîke (HDP) yê Wanî Umît Dedeyî zî vera qeyûman hêrsê xo ard ziwan.

'Qeyûmî Vera Waştişê Haştîye Ameyî Caardene'

Dedeyî qeyûmî sey dewamê demê şerî hesibnayî û va: ‘’Dimayê deme dîyalogî yo ke Serra 2015’ de bi Rayberê Şarê Kurdî Abdullah Ocalanî ameyêne rayraberdene şerê vera Kurdan kewt dewre. Ewro bi nê qeyûman na polîtîya şerî yena domnayene. Qeyûmî dewamê planê çokdayîşî yê. Tena qeyûm nê, qewimîyayîşê Îdlîbî, operasyonê Başûrî heme pabesteyê yewbînan ê. Birêz Ocalanî pêvînayîşê xo yê peyên de vatbi ke serr a 93’î ra nata heme gamê ke semedê haştîye yenê eştene, mîyanê dewlete ra tayî vernîya înan genê û hema hêzê înan ê şervetişî esto. Na eşkerayî ra dima hîrê şaredarîyanê bajaranê pîlan rê qeyûm ame tayînkerdene. Dimayo ke xoverdayîşê grevê vêşanîye ra dima tecrîd biney ame şiktene, semedê rayapêroyîye umîdê haştîye û çareserîye reyna bi zergûn. Polîtîkaya qeyûmî eşkera semedê şiktişê nê umîdî bi. Xora hetêk ra zî seba ke karanê xo yê leyşinan binimnî, înan dest na şaredarîyan ser.’’

'Wan de Hezar Rojî yo Qedexeyê Çalakîyan Esto'

Umîd Dedeyî bale ante  polîtîkaya zextî ya ke Wan de hîna xirab yena rayraberdene ser û va: ’’Nê serranê peyênan de şarê Kurdî û şaranê Tirkîya ser zextî giran bîyî. Wan de konseptêko cîya yeno caardene. Hezar ra zafêr rojî yo ke qedexe tîya esto. Çend walîyî bedilyayî la bajarî de teway nêbedilya. Her walî bajar de çalakî û aktîvîteyan qedexe keno. Ma demê weçînitişî de nêeşkayêne propaganda da zî bikerê. Bi qeyûmî zext hîna xorî bi. Polîs zaf xirab hêriş keno. Parlamenterî zî nêeşkenê bajar de têbigêrê. Qeyûm xora dizdîya girde ya. Dizdêk ewro destûr nêdano ke ma dizdîye îfade bikerê. Ma sey şarê Wanî do nê qedexeyan qebûl nêkerê. Walî xora bi xo dizdîye û xespî keno. Coka qerarê qedexeyî û vengdayîşê ey semedê ma bêmana yo. Ma îradeyê xo rê wayîr vejîyenê û ma do bi metodanê haştîkî protestoyanê xo rê dewam bikerê.’’