Endama Komîteya Merkezî ya PKKyî Hêlîne Umît Medya Haber TVyî de rojdem ercna.

Qiseykerdişê Hêlîne Umît ra tay noqtayê girîngî wina yê:

''Sîstemê Zîndanê Îmraliyî yo ke sîstemêkê îmha yo, tede Rayber Apo sey rehîneyî tepişîyeno. Şexsê Rayber Apoyî de dewleta tirke kena ke têgêrayîşê azadîye yê kurdan û cinîyan çin bikera. Şarê kurdî seba ney her firsendî de vera tecrîdî çalakîyan keno. Rayber Apoyî pêro emrê xo de seba azadîya şarê kurdî têkoşîn kerd. Coka şexsê ey de şarê kurd3i yeno tecrîdkerdene.

Ganî nê prosesî de merkezê têkoşînê ma de Rayber Apo bibo. Coka ganî destê ma ra çi bêro ma bikerê. La ganî ma bizanê ke ma çita bikerê seba xo do bikerê. Ganî ma bikerê ke Rayber Apo azad bibo. Azadîya Rayber Apoyî yena manaya azadîya kurdan. Eke tecrîd bişikîyo û Rayber Apo azad bibo haştîye zî do bêra. Xora tecrîdê Îmraliyî ra semed Tirkîya mîyanê krîzê ekonomîkî yê giranî û şerî de yo. Seba ke krîzan ra bixelisê ganî şar, hunermend, roşnvîr û kedkarê Tirkîya zî wayîrê Rayber Apoyî vejîyê.

Başûr de PDK û keyeyê Barzanîyan şarê kurdî rê îxanet kenê. Ganî şar ney hol bivîno. PDK destpêkî ra nata dişmenîya têgêrayîşê ma keno. Yew eleqeyê Barzanîyan bi kurdayetîye çin o. Barzanîyî teyna peyê menfaetanê madîyan de yê. Ganî şar, hunermend, roşnvîr û rêxistinê kurdî vera îxanetê Barzanîyan tewirê xo bimojnê.

Ez Kampanyaya 'Bi Jin Jiyan Azadî, Ver bi Azadîye' selam kena. Cinîyî Kurdîstan de dînamîkê têkoşînî yê. Sîstem cinîyan rê koletîye ferz keno. La yew komel ancax cinîyî azad bibê azad beno. Cinîyê kurdî bi şîarê 'Jin, Jiyan, Azadî' tarîxî nusenê. Ez pê bawer a ke na kampanyaya TJA do komelî bivurna. Xora cinîyê kurdî 30-40 serrî yo cografyaya kurdan vurnenê. La ganî cinîyê kurdî xo hîna zaf rêxistin bikerê. Ganî cinîyê kurdî bi xurtî tewrê Kampanyaya 'Bi Jin Jiyan Azadî, Ver bi Azadîye' bibê.

Herêmanê Pawitişî yê Medya de şero giran berdewam o. Gerîlayî bi çalakîyanê tesîrînan her roje danê artêşa tirke ro. Artêşa tirke her ca de şarê ma û hêzanê kurdan kena hedef. Dewleta tirke dişmena pêro kurdan û Kurdîstanî ya. Tek sîyasetê ci zî şer o. Xora Herêmanê Pawitişî yê Medya de şer hîna giran û merkezî yo la pêro Kurdîstan binê îşxalî de yo. Kurdîstan de xeta îxanetî zî tersena ke gerîlayî ser bikewê coka vera gerîlayan têgêrenê.

Seke zanîyeno Hewlêr de temsîlkarê KNKyî Denîz Bulbun ame qetilkerdene. Dewleta tirke vera xebatanê yewîye yê KNKyî no hêriş kerdo. Verê cû Hewlêr de selahîyetdarêkê MÎTî kişîyabi û PDKyî qîyam nabi ro. La wexto ke welatperwerî yenê qetilkerdene PDKyî ra veng nêvejîyeno. Eşkera yo ke Wezîrê Karanê Teberî yê Tirkîya Hakan Fîdanî pêvînayîşan de PDKyî de pê kerdo. Dewleta tirke nika zî gêrena ke YNK zî verê ci de bibo sey PDKyî. La şarê Silêmanî û Soranî welatperwer o û qetî waştişanê dewleta tirke qebul nêkero. Ganî şarê Başûrî vera îxanetê PDKyî û îşxalê dewleta tirke asta tewr berze de tewirê xo bimojno û dewleta tirke erdê xo ra vejo.''