Tirkîya de şîdetê vera cinîyan zêdîyeno. Hukmat wazeno Peymana Îstanbulî batal bikero la cinîyî vera naye nêrazîbîyayîşê xo mojnenê. Rêxistinê cinîyan, pawitoxê heqanê merdiman hukmat hîşyar kenê ke eke peymane bêra batalkerdene tehluke do bizêdo. Endama Meclîsê DBPyî û aktîvîsta TJA Zeynepe Uren derheqê şîdetê vera cinîyan  û batalkerdişê Peymana Îstanbulî de qisey kerd.

Urene ard ziwan ke seba ke hukmat Peymana Îstanbulî nêvisneno dewre şîdetê camêrdan ê vera cinîyan dewam keno. Urene îfade kerd ke îqtîdar têkoşînê cinîyan keno hedef û vat: ''Pêro hêrişê vera cinîyan polîtîk ê. Dewlete cinîyan nêpawena û wazena ke destkewteyanê cinîyan çin bikera. Camêrdê ke cinîyan kişenê îqtîdarî ra hêz gênê û îqtîdar camêrdan paweno.Îqtîdar bi nê hawayî serdestîya xo mende keno.

Ça de têkoşîn û destkewteyê cinîyan esto îqtîdar hêrişê uja keno. Qirkerdişê cinîyan hîşmendîya serdestîya camêrdan ra cîya nîyo. Kişîyayîşê cinîyan hetê hîşmendîya dewlete ra yenê serûberkerdene.

Roja ra ke Peymana Îstanbulî kewte rojdeme her roje tewr tay cinîyêke kişîyena, tacîz û tecawuzî zêdîyenê. Hêriş û şîdetê vera cinîyan milê xo danê îqtîdar û dewlete ro.Bi serran o ke tecawuz sey hacetêkê şerî şuxilîyeno. Ma tewr peyên Şirnex û Êlih de bîyî şahîdê nînan. Wexto ke unîformayî vejîyenê verbî pêro mekanîzmayî qefilîyenê.

Derdê dewlete pawitişê cinîyan nîyo. Peymana Îstanbulî cara bi hawayêkê fîîlî nêameye caardene. Peymana Îstanbulî babetêka qanûnî ra zêdêr babetêka dewa ya. Dewlete wazena naye birijna û bi hîşmendîya serdestîya camêrdan têbigêra.''