Vakurê Kurdîstanî de goristanî ameyî zîyaretkerdene

Pê wesîleya Roşanê Qurbanî xeylêk şaristananê Vakurê Kurdîstanî de gorê şehîdan ameyî zîyaretkerdene.

Rayberîya HDPyî de bi wesîleya Roşanê Qurbanî Amed, Wan û Şirnexê Vakurê Kurdîstanî de gorê şehîdan ameyî zîyaretkerdene.

Amed

HDPyî gorê şehîdanê PKKyî û şehîdanê Kobanê zîyaret kerdî.Îdarekaranê HDP û DBPyî  û MEBYA-DERî reyde Goristanê Çemê Elîka zîyaret kerd. Dersime Dag zîyaret de qisey kerd û vat: ''Ma do wayîrê goranê xo vejîyê. Hêrişê vera goran şexsê kurdan de yenê kerdene. Îslamîyet de cayê hêrişê vera goran çin o. Şehîdê ma rûmetê ma yê.''

Licê

Wekîla HDPyî Remzîye Tosun, Nusrettîn Maçîn, îdarekaranê HDP û DBPyî, endamanê MEBYA-DERî Goristanê Sisê zîyaret kerd. Remzîye Tosun zîyaret de îfade kerd ke Goristanê Sisê ame vêşnayene û no yew wahşet o. Remsîye Tosun vat: ''Se beno wa bibo ma do wayîrê goranê xo bivejîyê. Şima goranê ma ra zî tersenê. Na bêwijdanî ya.''

Pîran

Hemsereka DBPyî Salîha Aydenîz, Hemsereka HDPyî ya Amedî Hulya Alokmen Uyanik, keyeyan û îdarekaranê MEBYA-DERî Goristanê Pîracmoyî zîyaret kerd. Heyet vejîyayîşê Pîranî de hetê leşkeran ra ame vindartene û leşkeran nêverda ke heyet şoro. Salîha Aydenîz vat: ''Qereqolî nêweşî û operasyonî bahane kerdî û nêverda ke ma roşanê şarê xo pers bikerê. Ma qeymeqam şermezar kenê. Çunke o nêeşkeno bire bido ke wekîlî eşkenê şorê kamca.''

Wan

Rêxistina HDPyî ya Wanî Goristanê Rêya Armûşî, Selîmbeg, Seyrantepe û Hacibekîrî zîyaret kerd. Îdarekarê HDPyî, aktîvîstê TJA, îdarekarê MEBYA-DERî û TUYAD-DERî zî tewrê zîyaretan bîyî. Heyetî goristanan de hêverî duayî kerdî û deqayêk rêz girewt.

Şirnex

Rayberîya TJA de merkezê Şirnexî de gorê Sêvê Demîr, Pakîze NAyir, Fatma Uyar, Asya Yuksel, Mehmet Tunçî zî tede xeylêk gorî ameyî zîyaretkerdene. Dadî û domanê Mehmet Tunçî zî tewrê zîyaretan bîyî.

Cizîre

Cizîre de zî şar Goristanê Asrî zîyaret kerd ke hetê dewlete ra ame girewtene. Hemwelatîyan rixmê astengîyan zî şîyî serê goranê merdimanê xo û duayî kerdî. Rêxistina HDPyî ya Cizîre zî Goristanê Asrî zîyaret kerd û gorê kesanê ke qedexeyê tebervejîyayîşî de dinayaya xo bedilnaye, yad kerdî.