8ê temmuza 2014î de seba vîrameyîşê kesanê ke serra 1938î de serebûtanê Terteleyê Dêrsimî de Erzîngan de bi hawayêkê komkîyî ameyî kiştene Cayê Yadkerdişî yê Qulika  Zînî virazîyaye. Qulike hetê kesan ra ke nasnameyê înan nêzanîyenê ameye rijnayene. Înîsîyatîfê Qulika Zînî derheqê babete de eşkerayîye daye û nêrazîbîyayîşê xo mojna. Înîsîyatîfî îfade kerd ke ê do qet na barbarîye efû nêkerê û waşt ke rayaumûmîye û selahîyetdarî bala xo bidê na mesele ser.

Wekîlê HDPyî yê Îstanbulî Zeynel Ozenî zî babete berde rojdem û derheqê babete de vernîyazêkê persan pêşkêşê Meclîsî kerd. Ozenî vernîyaz de waşt ke mesuldarê nê hêrişî bêrê dîyene û derheqê înan de tehqîqatêk bêro akerdene.

Qulika Zînî de se bibî?

8ê tebaxa 1938î de qasê 100 kesanê bêsûcan wextê serebûtanê Terteleyê Dêrsimî de sînorê Dêrsim-Erzînganî de Qulika Zînî de bi hawayêkê komkîyî ameyî kiştene. O çax herêma Qulika Zînî sey 'qedexe' ameye îlankerdene. Bi nê hawayî meyîtê nê kesan zî nêameyî definkerdene. Hemwelatîyê bînî yê herême zî ameyî surgunkerdene. Serra 1950an de herême de qedexe wedarîya û esteyê qurbananê Qirkerdişê Qulika Zînî ameyî dîyene.

Serra 8ê temmuza 2014î de hetê Înîsîyatîfê Qulika Zînî ra esteyî ameyî komkerdene û cayêkê yadkerdişî ame viraştene.