Komîteya Şar û Bawerîyan a KCKyî derheqê qiseyanê Erdoganî yê serê şerê Îsraîl û Hamasî de eşkerayîyêke daye. Eşkerayîye wina ya:

''Dewleta tirke 7ê teşrîna verêne de hêrişê camîya Kampa Mexmûrî kerdbi. Ma nê hêrişî şermezar kenê. Dewleta tirke ya îşxalkere-kolonyalîsta ke hîsanê dînîyan şuxilnena, hêrişanê vera Kurdîstanî rê dewam kena. Çalakîya fedayî ya Anqara ra dima dewleta tirke seba ke îmajê xo raşt bikerê hêrişê Rojawan û Şingalî kerd. Operasyon û hêrişê vera Herêmanê Pawitişî yê Medya zî dewam kenê û gefê vera şaristananê sey Silêmanî zî dewam kenê. Nê hêrişê qirkerdişî dewamê Komployê vera Rayberîye yê.

Dewleta tirke û şîrikê ci ziwanê kurdan qedexe kenê, waştişanê kurdan bi çekuya 'terorîzmî' pênase kenê la qiseyanê Îslamî fekê xo ra kêm nêkenê û kurdan qetil kenê. Nê derheqê şerê Gazze de vengdayîşê îtîdalî kenê. Goreyê edaletê dînî; heqê kurdan est ê ke sey misilmananê bînan erdê xo ser de biciwîyê, bi ziwanê xo qisey bikerê, xo îdare bikerê, dezgehanê xo awan bikerê. Sîyaset û eqlê dewleta tirke û îqtîdarê ci yê îslamîyî nînan qebul nêkenê.

Şarê Mexmûrî şarêko winayên o ke bi xoverdayîşê xo yê vera zulmî şinasîyeno. Şarê Mexmûrî vera hêrişanê dewleta tirke qetî teslîm nêbi û neçare mend ke koç bikero. Şarê Mexmûrî bi serran o binê ambargoyê PDKyî de raştê zulm û îşkenceyî yeno. La rixmê nê kerdişanê PDKyî zî şarê Mexmûrî teslîm nêbi. Wa şarê ma yê Mexmûrî bizano ke seba ke nîyetê înan hol o, karê înan pak o; îbadetê înan do bêrê qebulkerdene. Têkoşînê heq, edalet û vejîyayîşê vera neheqîye zî îbadet ê. Têkoşînê vera zulmker û zorbazan îbadeto tewr pîl o. Bombardumanê vera camîya Mexmûrî dişmenîya Erdoganî û hemkaranê ci ya vera Îslamî eşkera kerde.

Erdogan û dewleta tirke bi hêrişanê vera Rojawan, Mexmûr û Başûrî îsbat kenê ke qet yew erjî nêşinasnenê û erjanê Îslamî binpay kenê. Erdogano ke fekê ci ra qiseyê Îslam, Quran, pêxember û wayûbiratîya Îslamî kêm nêbenê bi ferasetê yew netewe, yew dewlete û yew ziwanî ayetanê Homayî înkar keno. Sere de kurdan ma venga pêro misilmananê dinya danê ke vera na dişmenîya serê dînî nêrazîbîyayîşêkê xurtî bimojnê.

Ma venga pêro alîmanê dînî û kesanê biexlaq, biwijdanan danê ke vera hêrişanê qirkerdişî vengê xo berz bikerê. Ma venga cinî û ciwananê misilmanan, êzidîyan, elewîyan û bawerîyanê bînan danê ke bi xurtî tewrê têkoşînê seba azadîya Rayberîye bibê. Ma venga pêro misilmanan danê ke vera nê hêrişanê qirkeran ê barbaran tewirê zelalî bimojnê.''