Dêrsim de wendekara Zanîngehê Munzurî Gulîstane Doku 5ê çeleyî de tewr peyên Zaynal Abakarovî reyde dîyaye û a roje ra nata zî tira xeberêke zî nêameye girewtene.

Ame parekerdene ke bi bahaneya ke nêverda babîyê vergumanê yewinî Zaynal Abakarovî Engîn Yucel keyeyê xo bihewilno waka Gulîstane Aygule Doku rê hetê Asayîşê Mudirîya Erxenî ra qasê 50 hezar TL cezaya pereyî dîyaye.

Wake Aygule Doku vera babete nêrazîbîyayîşê xo mojna û da zanayene ke keyeyê Yucelî de cigêrayîşo krîmînal nêame kerdene coka aye hewilnayîşê keyeyî asteng kerd.

Aygule Doku îfade kerd ke aye zerarêk nêda malanê Yucelî û vat: ''Beno ke ê keyeyî de waya mi ra rêçêk estbi. A roje polîsan zî nêverda ke keye bêro hewilnayene. Engîn Yucelî vato mi zerar dayo malanê ci. Înan waya mi mara girewte nika zî çim verda pereyê kefenê dadî û babîyê mi.''