Wan de rîyê vîrusê Korona ra bi hezaran kesî bêkar mendî û xeylêk esnafan zî dikanê xo girewtî. Şarê Wanî mîyanê deynanê kredî de xeniqîyenê. Wan de xeylêk bîba, tax, dew û dewekî û tewr tay 50 hezar kesî binê karantîna de yê.

Serekê Odaya Herêma Muşavîranê Malî û Muhasebekaran ê Serbestan (SMMMO) Îbrahîm Şahînî ard ziwan ke vîrusê Korona Wan de do bibo sebebê netîceyan ê cidîyan û şaristan de hema zî tesîrê Erdlerzê Wanî yê 2011î dewam keno. Şahînî da zanayene ke prosesê Korona de şaristan de xeylêk dikanî qefilîyayî.

Îbrahîm Şahînî vat: ''Ekonomîyê şarî rîyê vîrusê Korona ra vindert. Esnafî binê zerarêkê pîlî de yê. Tewr tay se ra 90 esnafî tesîrê nê prosesî de mendî. Ekonomîyê Wanî cara mîyanê tengîye de yo eke wina dewam bikero krîz do bibo pîlêr. Pê qijbîyayîşê ekonomîyî bêkarîye zî zêdîyena. Pê rayîrê ÎŞ-KURî kesan rê ke kargehê înan qefilîyayî hetkarîye yena kerdene. Bankayan pare kerdbi ke ê seba esnafan paketan amade kenê la vaya nê paketan zêde ya. Krîzo esas peynîya prosesî de do eşkera bibo. Seke welatanê bînan tîya de zî çarçewa têkoşînê vera vîrusî de tedbîrî ameyî girewtene. Ma do bivînê ke ekonomîyê Wan û Tirkîya vîrusê Korona ra dima do senî bibo. Aseno ke ekonomîyê şaristanê ma do tengîye bianco.''