Wan de goreyê doneyanê fermîyan hûmara nêweşanê vîrusê Korona bîye 380 û 8 kesî zî Korona ra merdî. Şaristan de 44 hezar kesî zî binê karantîna de yê. Verê cû zî dewanê qezayanê Şax, Elbak û Ebexî de vîrusê Korona amebi tesbîtkerdene.

28ê adare de dewa Hanî ya Ebexî de dima ke Îstanbulî ra tay kesî seba şînî ameyî vîrusê Korona amebi tesbîtkerdene. Reyna dewa Ormetaşî ya Elbakî de kesanê ke Îstanbulî ra ameybî de vîrus amebi tesbîtkerdene. Dima dewe de hûmara nêweşanê vîrusê Korona bîye 60.

Wan de ke bêtedbîrîye asta berze de ya, taxa Ortanca ya qezaya Rêya Armûşî de rîyê şînî ra hûmara nêweşan zêdîyaye. Dewe de nê di rojanê peyênan de hûmara nêweşan bîye 93. Kesê ke beşdarê şînî bîyî, şîyî zaf cayanê Wanî. Nê kesan rê hema kontrolê weşîye nêame kerdene.

Şaristananê tirkan de hûmara waqayanê vîrusê Korona kêmîyena la Wan de bi lezî zêdîyena. Na rewşe zî bena sebebê qesawetî. Bi taybetî merkezê Wanî û qezayan de şar maske nêxebitneno û goreyê mesafeya komelkî tênêgêreno. Akerdişê tay cayanê sey AVM û kuaforan zî qesawetê şarî zêdîneno.