Wextê qedexeyê çalakîyan ê Wanî yo ke 2 hezar û 35 rojî verê cû hetê walîtîye ra ame parekerdene, reyna ame dergkerdene. Rîyê qedexeyî ra tewr tay 4 serran ra nata şaristan de aktîvîteyêka hunerî zî nêna kerdene.
Hukmatê AKPyî 15ê temmuza 2016î xo rê sey firsendêk dî û rewşa îstîsnayîye îlan kerde. Rewşa îstîsnayîye de 120 hezar kesî karî ra ameyî vetene, bi seyan televîzyon, radyo û rojnameyî ameyî qefilnayene. Rewşa îstîsnayîye 20ê temmuza 2018î de qedîyaye. La belê Wan de tim dewam kerde. Wan de her 15 rojan de yew wextê qedexeyê çalakî û nawnayîşan yeno dergkerdene.
Wan de 4 serran ra nata festîvalêke, konserêk ne zî festîvala kitaban nênê kerdene.
Huqûqnase Sevda Aydin ANFyî rê asta qedexeyê çalakîyan ser o qisey kerd û vist vîrî ke 15ê temmuza 2016î ra nata Wan de 3 walîyî vurîyayî labelê qedexeyî tim dewam kenê.
Sevda Aydin vat: ''Rewşa îstîsnayîye bi xo bêhuqûqî ya. Goreyê qanûnê bingeyînî rayraşîyayîş û nawnayîşê haştîyane heqê merdimîye yê. Walîtîya Wanî pê bahaneya qedexeyî tim tehlukeyê ke çin ê ardî ziwan. Gelo no tehluke çi yo ke 4 serrî yo ke nêqedîyayî?''
Huqûqnas Cahît Ertanî zî pare kerd ke mabênê dewleta huqûqî û dewleta qanûnî de cîyatîye esta û bahaneyê ke seba qedexeyan yenê mojnayene huqûqî nîyê. Cahît Ertanî da zanayene ke Baroyê Wanî vera nê kerdişanê Walîtîya Wanî zaf dewayi akerdî la hema zî nê dewayan ra netîceyêke nêgirewte.
