Wan de serê sibayî polîsan eşte keyeyê Hemsereka Komeleya Paştdayîş û Hetkarîya bi Kesanê ke Merdimê xo Vînî Kerdî (MEBYA-DER) Gulîstane Onver ser. Polîsan dest na kitabanê Onvere ser, 2 saetan keye de cigêrayîş kerd. Polîsan Onvere zî berde û bînaya MEBYA-DERî de zî cigêrayîşî kerdî.

Cigêrayîşî ra dima Onvere û di destbendkerdeyê bînê ke nameyê înan nêzanîyenê, ameyî berdene bi Mudirîya Asayîşî ya Wanî.

Dîya zanayene ke wextê destbendkerdişê înan çar roj ê û 24 saetan nêeşkenê avûkatanê xo bivînê. Pawîyeno ke hûmara destbendkerdeyan bizêdîya.