Dêrsim pêro Kurdîstan de kelaya xoverdayîşê vera zulmî ya. Şarê Dêrsimî koyanê xidaran ê Dêrsimî de xo ver da û qetî vera dişmenî milê xo nêard war.

No xoverdayîşê Dêrsimî ewro pê têkoşînê PKKyî resa astêka tewr berze. Şerê şerwananê azadîye yê koyan Kurdîstan de ters qedîna. Gerîla Dîcle Avaşîn ma rê qala gerîlatîya Dêrismî kerde.

Gerîla Dîcle Avaşîn vat: ''Ez seba ke biba parçeyê têkoşînî ameya dergehê koyam. Cayo ke ez reya verêne tewra partî bîya Dêrsim o. Mi verî qala koyanê Dêrsimî eşnawitbi, mi tim meraq kerdêne. Coka mi bire daye ke ez Dêrsimî ra tewr bina û mi verê xo da koyanê Dêrsimî. Wexto ke mi linga xo na erdê Dêrsimî seke mi tarîx hîs kerd. Mi verî qala Terteleyê Dêrsimî eşnawitbî la koyan de dîyayîşê ê kerdişan, destpadayîşê ci kerd ke ez zerrî ra xoverdayîş û dejanê şarê ma hîs bikera.

Xidarîya koyanê Dêrsimî asanîye dana merdiman. Her kerra, dare û awa ci behsê serebûtanê tarîxî kenê. Dêrsim şikefteyê xozayî estê. Gerîlayî zimistanan seba pawitiş û mendişî xo rê cayan virazenê. Ma zî seba naye gêrayêne cayêk. Wexto ke ma erazî ra gêrayêne ma şikefteyêko xozayî dî û ma tay cayê ci seba xo kenayî. Her kenayîş de seke ma qîrayîşê doman û cinîyan eşnawitêne.

Pêro embazan eşnawitêne û no hîs kerdêne. Dêrê Laçî de qirkerdişê pîlî ameyî kerdene, 1938 de her ca bi gola gonîye. Dêrsim de cinîyan seba ke nêkewê destê dişmenî xo kendalan ra eşt war. Qîrayîşê nê cinîyan hema zî koyan ra zimîyenê. Merdimî wexto ke nê çîya  vînenê tarîxî hîna bi hawayêkê gandarî ciwîyenê.''